倪乐琳卸任港姐对发展前景感迷惘爆冇钱俾家用愧对父母：悭啲使

倪乐琳（Ellyn）今日（9/9）现身沙田出席珠宝品牌活动。对于正式卸任，完成港姐使命，展开新一页，Ellyn接受《香港01》访问时表示：“其实而家有新一届港姐接班人马，变咗我而家系一个新人倪乐琳。之后嘅发展系向主持，又或者拍剧方面发展，变咗系要慢慢去摸索，系会有少少迷惘。”

被问到如何面对迷惘情况？Ellyn表示：“而家不断咁增值自己，去学唱歌跳舞，而最近又发现自己有懒音，都谂紧点去改善，变咗系要去装备自己。（有剧拍未？）最近为《飞常日志2》开工，但唔算重戏份，已经起码有对白讲，已经好开心。（有剧拍个心系咪定啲？）个心系定咗好多，其实我哋几个都好迷惘，大家都话死啦，完咗香港小姐之后会点样呢？因为唔知会有咩工作。但好好彩公司俾咗呢个机会我。”

提到到拍完手头上剧集，将面临再一次迷惘。Ellyn续说：“我觉得喺呢一行嘅常态，我谂要趁啱啱入呢行去点样调整心态。（调整还调整，始终会有压力！）咁所以唯有悭啲使。始终工作唔稳定，咁所以唔好咁大使，咁咪可以训练我哋财富管理能力。（俾唔到家用，面对父母有否感到内疚？）佢哋系好体谅，每一行刚入职都唔会好高人工。（冇内疚感！）咁系有少少内疚，但我相信2至3年之后会俾到佢哋。”