李龙基（基哥）与王青霞（Chris）经历风风雨雨多时，男方多次在访问中扬言非卿不娶，原本以为打风都打唔甩，但随著YouTuber“导游哥哥”Hugo踢爆王青霞早在内地结婚、育有16岁儿子后，这段恋情正式告一段落。基哥得知自己竟是第三者后，与王青霞正式分手，有网民指“计算基”十分识玩，“基关算尽”后能全身而退，甚至质疑当初是李龙基报警举报女友，早前基哥为了还自己清白，首度自爆当日其实与王青霞一同被捕，而他接受《01娱乐》访问时，更详述首次被警员上门搜屋、坐猪笼车、落口供落足10小时等等的感受。
此外，他亦透露王青霞近日向自己表示正与老公协议离婚，虽然目前仍然未有实际进展，基哥认为谈复合与否仍言之尚早，不过他也不讳言：“呢一刻我都仲系好爱佢。”

李龙基专访反驳“计算基”举报王青霞等指控　晒法庭文件证早离婚

忆与王青霞一同被捕　谈首坐“猪笼车”感受：唔惊，但好困扰

外间曾有传言指基哥特意趁自己不在港时，举报王青霞以及让执法部门上门拉人抓人，基哥不甘受屈，早前首度披露当日他也在现场一同被捕，他在《01娱乐》专访中详细忆述当时情况：“当日大约两点零钟，我同王青霞一齐返到屋企，搞吓嘢、坐低休息吓，忽然间有几个男士拍门。我一开门，入境处嘅，我话咩事？当阵时拉咗王青霞，冇错，拉埋我，因为我系涉嫌教唆王青霞逾期逗留香港，另外，话我知情不报。”

他透露当时警方先带他返回警察总部落口供，由下午2点笔录到凌晨，过程中王青霞则留在家里，待执法人员搜屋搜证后才去警署。这也是基哥 75 年人生中，第一次坐上俗称“猪笼车”的警用押解车，问到会否很害怕，他丝毫没怯过，但谓：“我就觉得‘咩事呢？’我听佢哋讲，话王青霞逾期居留，我直情打个突呀你知唔知？我唔系惊，我做人，由头到尾行得正企得正，我冇做过咩坏事，所以我唔惊坐喺个猪笼车𠮶度真系，百般滋味在心头，谂嚟谂去，做咩事呢？做咩事呢？个人好困扰，我唔系惊。”

律师费高达六位数　踢保需时两年坦言不觉得会坐监

就在这个下午突如其来的一别，他与王青霞在墙内外分隔了一年半，问基哥被捕当日可曾想过王青霞完全不能保释，他坦言自己保释回家后脑袋一片空白，直至电话响起：“冇几耐，入境处畀佢打电话畀我，佢就叫我‘你咩都唔好做喇，你唔好理我啦！’我话‘我唔可以唔理你，我一定要揾律师嚟帮你。’所以我后来就揾咗啲律师帮，好多人怀疑，话你有冇请到律师，我除咗请律师帮佢之外，我仲要请律师帮我自己。好多人都净系觉得，我请律师系帮佢，我都需要律师，有几次我上返去入境处，都要律师陪同我上去。”问到前后花费多少律师费，基哥隐晦暗示是六位数字。

除了要请律师帮手外，自逮捕后基哥展开了长达两年的“签保”生涯，每三个月就要返入境处报到，足足扰攘两年才能“踢保”。他坦言当时虽然只需 1,000 元担保，且无需交出旅游证件，已预感罪名不重，除非是王青霞开口指控他，否则他认为没有入狱可能：“我冇，我冇，因为当入境处提出，问我有冇$1000担保，我系觉得，咦？都唔系咩重嘅罪名，若果重嘅罪名点可能俾你$1000担保？仲有，唔使交出旅游证件？冇可能，所以我觉得唔算重，就算入咗我罪，好可能都系签担保、守行为、罚款之类，我唔惊。”至于为何时隔一年多才公开被捕一事，他直言最初并不想讲，直至被持续冤枉才决定自爆：“唉，我觉得冇咁嘅需要，冇咁嘅需要，始终都唔馨香，俾人拉㖞，唔馨香。但系我身边好多朋友都知，打电话嚟问‘喂你有冇事呀？’我话冇，签保啫。”

筑爱巢迎女友出狱对方却出走返老家　忆10字情话落泪

王青霞出狱当日，李龙基带住鲜花去迎接，原以为伊人出狱后是新开始，基哥甚至早已在珠海租好单位准备“双宿双栖”，怎知一、两个月后，二人关系急转直下，王青霞竟趁基哥去美加登台期间，独自返回佛山家乡与父母同住，一去不返。基哥深知女友双亲不喜欢自己，也不会强求见面，但遗憾的是连短讯也愈来愈少：“初初都有㗎，但系后来我message佢，佢冇覆，等等等……好夜，覆一句‘哎呀，我返屋企喇，好攰，冲凉喇，唔讲喇。’好多时都系咁，会感觉到𠮶个对比好大，我自己都有咁嘅输数。”二人拍拖以来，基哥都因为年龄差而时常问女友：“你究竟系咪真系好诚心咁接受我㗎？系咪真心真意咁爱我㗎？”亦因为女方情深又有文采的回应，使他深信不疑，甚至是基哥如今在访问中重提，也一秒落泪，哽咽说：“佢也曾讲过，佢……唉，仲几有文采，佢话‘君生我未生，我生⋯⋯君已老。’所以我好信佢㗎𠮶阵时，但系后来好可能返咗屋企之后，太多佢父母嘅声音、周边𠮶啲亲戚嘅声音，都令到佢开始有少少……即系一离开咗之后，唔系日见夜见，感情一定淡。”

女友突然离家出走，基哥直言：“冇喇，我成日自己一个人喺珠海𠮶间屋𠮶度对住四埲墙。”他虽然唏嘘，却也看得很开，不会强人所难冲去佛山讨说法：“我年纪大佢咁多，佢离开我其实，某个情况系应该嘅，应该揾一个比我更好嘅。我年纪咁大，尤其是呢几年，喺我身边，好似最近……梁小龙，77岁，走咗啦，我唔担保㗎㖞，我唔担保我77岁会唔会随梁小龙而去呢？所以我都有咁嘅思想，其实佢唔跟住我都系一件好事，喺呢个生命中，也曾有一段欢乐嘅时光，都算好。”

王青霞被爆已婚　基哥惊见对方全家食饭感晴天霹雳

去年冬至，爆料YouTuber“导游哥哥”Hugo的航拍画面成为压死骆驼的最后一根稻草，画面中王青霞与老公及家人温馨聚餐，基哥一见到这些画面顿时晴天霹雳，马上找王青霞问个究竟，“佢话因为佢而家呢个先生，喺佢父亲间厂有好大功劳，仲系做紧个好高嘅职位，所以咁重要嘅日子就要同佢食饭。当然啦，站喺我嘅立场，我当然好唔开心，乜嘢原因都好啦，算啦，我自己知咩事。”既然有图有真相，基哥也只好放手，这段7年情在2025结束前正式划上句号。

基哥指两人现时仍保持联系，却只有基本寒暄，或是间中传传生活照、工作照，生疏得像陌生人：“寻日佢都send个message话天气好冻、注意身体、着多件衫、唔好冷亲。我都回佢‘你都保重，大家保重’，绝对系生疏咗好多好多。”问到现时是否日日聊天，基哥竟回：“唔系，有两日都冇同佢倾过偈。（记者：咁两日都唔系好多啫。）好多㗎喇！当初佢返咗佛山𠮶时，每日起码都五、六条讯息！”

王青霞称结婚不久已只身赴美　解释冇感情仍不离婚原因

王青霞2011年首次与基哥邂逅，但原来当时她已成人妻4年，基哥指：“佢二零零几年结婚，结咗婚冇几耐，好快就生咗个仔，但系生完仔好奇怪，佢自己只身去咗美国，咁当然佢同我讲，佢同佢老公发生咗一单好大件事、好重要嘅事，咁佢唔想讲，我亦都不便追问。佢同我讲，佢同佢老公中间系完全冇接触嘅。”谈及王青霞是否在出狱后回到佛山才与老公重遇，基哥不欲再深究，但既然王青霞与老公长期分隔两地又声称一早冇感情，何不一早离婚？基哥说：“照我估计呢，佢可能，唉，心灰意冷，乜都唔理喇，只身走咗过美国算数！系咁嘅心态，或者点呢？事实有啲人觉得，就算唔离咪唔离啰，佢老公都系咁，我自己感觉，点解个老婆走咗咁耐，都无动于衷嘅？奇怪㖞，所以好可能呢个世界上真系有啲咁奇怪嘅人。”

基哥与王青霞爱得高调，照理佛山老公都不会毫不知情，基哥坦言：“知！所以我咪话呢一位Hugo哥哥，唔好自作小人。我哋咁多年咁高调，若然呢位陈先生呷醋嘅，肯定搞出大龙凤出嚟啦系咪？最低限度开个记者招待会，话李龙基呃我老婆啦，有冇吖？冇，从来冇出过声，点解？细心谂吓。”问到王青霞的儿子多年来是否跟父亲生活，基哥说：“佢话佢个小朋友就冇跟佢先生，系跟佢父母，跟住公公婆婆，所以照我估计，呢个先生可能都大问题。”

揭王青霞正协议离婚　李龙基未敢谂复合：到时先算

基哥21岁结第一次婚，阅人无数、情场经验也肯定不少，想不到在75岁迎来人生最伤的一次失恋，“最痛当然系我咁爱佢，佢居然可以保得咁密。我好多次想同佢结婚，当阵时佢未出事之前，我已经系想同佢结婚，因为𠮶时我同我前妻离咗婚，都想同佢结婚，但系唔知佢系用咩理由，卒之又冇结到，后来当然啦，经过冬至呢单嘢之后，我就知咩原因啦，佢根本冇办法。但系佢冬至之后就show咗张纸畀我睇，就系佢同佢先生协议离婚，咁唔知啦，呢啲日后先算。”

基哥指离婚协议书在2025年所拟，日子在王青霞出狱后、冬至之前，即未被爆料人揭发时她已有离婚打算，问基哥觉得她是否为了自己而终于离婚，他说：“佢都也曾同我讲，佢话离婚系必定要嘅，佢话为咗我好，为咗佢自己都好，佢都要嚟，咁样。不过……喺我而家呢个立场嚟讲，讲乜嘢都冇乜用，睇结果啰，真系离咗婚先算啦。（有冇进展？）冇继续去追究啦，或者有朝一日，佢message我‘我离咗婚喇！真正离咗婚喇！’咁到时先算。”

被呃到透的基哥明显已有点心淡和消极，记者续问，若王青霞有日真的离婚求复合，他会否答允，他认为要视乎当时仍否互相相爱，至于他是否仍深爱著王青霞，他直认：“唉，你问我，呢一刻我都仲系好爱佢，呢个真，所以其实，我爱佢，亦都希望佢能够揾到个更好，或者喺一个更好嘅环境生活。虽然佢话佢同老公冇晒感情，但系有个仔，有老窦老母，呢个环境都比较好啲。”上一篇专访中提到，基哥虽已跟前妻卓海霞在香港办妥离婚手续，但假若要在内地结婚，仍需在香港申请一个“寡佬证”，当讲到会否办定寡佬证等待王青霞回头，基哥淡淡然谓：“到时先算。”

坚信女友非贪钱：我虽然懵懵地，但都仲有半点清醒

从局外人看来，王青霞种种行为绝对已达“信用破产”级别，绝不原谅，但基哥就表示：“佢有内疚，好深深嘅内疚，佢成日讲对我唔住，唉，真系咁。”早在二人公告恋情早期，不少人都认为王青霞是贪图李龙基的钱、名气，目的并不单纯，不过时至今日基哥仍处处维护，坚信对方不带任何动机，相爱纯粹是缘份使然：“唔觉，唔觉，我完全唔觉，因为我虽然懵懵地，但系都仲有半点清醒嘅。完全唔觉，佢唔系咁嘅人，我系好感觉到佢系好爱我，否则我哋唔会发展得咁好，若果佢唔系发生咗啲咩事，我相信若然佢系个背景冇咁复杂嘅话，我哋真系有机会结婚。”

不得不提，2020年王青霞曾经小产，虽然都有人会怀疑究竟这会否都是一个谎言，基哥则直言：“我接触得佢最近，我睇到佢个肚，我同好多朋友出去食饭，啲朋友都话‘有冇三个月呀？个肚咁大？’睇到嘅，呢个应该冇得呃，除非佢塞啲嘢落个肚，但系著住衫就还可以啫，我哋咁亲密，唔会嘅。”

王青霞昔日在囚时，李龙基曾向记者透露有很多狂蜂浪蝶埋身，有女子向他示好，自荐补上王青霞的“空缺”，如今他正式回复单身，又有没有女子埋身呢？他自爆有拒绝了一些人：“我直情讲咗，我话我暂时唔会，所以暂时都应该冇。”基哥讲到明此刻心如止水，而回忆起两年来没完没了的纷纷扰扰，记者问到若然他日与王青霞复合或有新女伴，会否考虑低调恋情，不对外公开免招话柄，他认为做艺人想保密很困难，除非他永不带对方现身：“不过咁，其实点解我当初带王青霞出嚟，我觉得好正正当当，我都离咗婚，我同佢发展，冇事吖，唔知后来啲嘢啫，所以我都系抱住咁嘅心态，你哋知咪知啰，就系咁简单。”