旺角男人肉霸位：入咗表 司机企硬照倒车 网民：乱入空表派财神
“人肉霸位”事件不时发生，有司机近日分享行车记录仪（车cam）影片，旺角上海街有白发男子“人肉霸位”，并声称“（架车）嚟紧㗎啦”及已入表。司机“企硬”继续倒车，提出“畀返钱”及不介意报警，不屑道“你车都未有，入咩表啫？搞笑呀你”，最终成功迫走白发男。司机更于帖文留言区补充说，“事后落车睇佢系冇入到表”。
网民批评白发男，“个个都话嚟紧，咁企喺度等到几时？边度有人肉霸位咁乞人憎㗎？”，又揶揄“乱入空表自己攞嚟，派财神”、“Keep住入够5年表，个表位写埋你名好冇呀”。
有网民赞赏司机，“欣赏片主嘅对答，不愠不火，又可以中正要害！”、“片主算有礼貌，正常一定XX佢”，并指出“系咪佢入钱都无人知，上一手留低唔得嘅”、“真系好，仲话畀返钱佢，畀着系我就‘你入表关我X事？多谢晒㖞’”。
该司机于facebook群组“车cam L（香港群组）”发文发片无奈道：“车都未到，仲想人肉霸位。”
旺角男人肉霸位：入咗表 司机照倒车
“车cam”画面见到，事发于11月2日下午1时许，旺角上海街，1名穿深色上衣、白发男子站在车位处欲“人肉霸位”，司机未有理会照样倒车入位，迫白发男离开。
白发男：我入咗表 司机：咁我畀返钱你啰
白发男于是走上前敲司机位车窗说“（架车）嚟紧㗎啦”，司机指出“你唔可以人肉霸位㗎㖞”，白发男说“咁我入咗表啦嘛”，司机提出“咁我畀返钱你啰”，然后继续倒车。
讵料白发男突说“你即系打横嚟嘅啫”，司机“企硬”指“我冇问题呀，你报警啰”、“你车都未有，入咩表啫？搞笑呀你”。
网民揶揄白发男：我未出世就排紧队喇
“乜都唔好讲，敲我车一定X”
“自己打横嚟，仲话X人打横嚟”
“打横嚟……你同佢讲我打直嚟，直接泊入个位𠻹呀”
“车都未有就入表，你答佢我未出世就排紧队喇”
“今时今日仲有人做埋啲咁戆X嘅嘢，以为人肉霸位好有型，依家差唔多架架车都有摄像头，俾人影晒出嚟你话几核突呢？畀啲亲戚朋友见到真失礼”
“车主算几客气了，要靠大家一齐守护有规有矩的香港”
网民：你钟意无车入表做善事关人鬼事
“入咗表大晒？咁我入咗多咗时间畀下架，系咪可以问佢攞返钱？”
“你钟意无车入表做善事关人鬼事，不嬲都系先到先得”
“做乜要畀返钱佢？佢一番好意，你应该讲多谢”
“我会同佢讲你报警等警察嚟，一毫子都唔X畀佢，佢本人戆X关人X事”
“笑死，有无入足两个钟？记得阵间帮我续多两个钟，唔该晒师傅”
人肉霸位可罚款兼坐监
“人肉霸位”可能犯法。根据《简易程序治罪条例》4A条，任何人无合法权限或解释而陈列或留下，或导致陈列或留下任何物品或东西，而这些物品或东西对在公众地方的人或车辆造成阻碍、不便或危害者，或可能对在公众地方的人或车辆造成阻碍、不便或危害者，可处罚款5,000元或监禁3个月。
另根据《道路交通条例》第49条，任何人没有合法权限或合理辩解而登上1部车辆，或干预该车辆任何部份，即属犯罪，可罚款5,000元及监禁12个月。