港铁女1人放胶袋占3座位 否认霸位：你咪坐啰 网民斥：强词夺理
用胶袋占座好离谱！近日网上流传1段港铁骂战影片，有戴红色头巾、穿白色短裙的女子乘搭港岛线时，将3个购物胶袋分散放在车厢3个座位上，她则坐在中间座位，有女乘客不满女子用胶袋“霸位”出声指责，女子竟大条道理反驳“我几时有霸住个位呀？你咪坐啰，好似我咁样，坐一半”、“打横嚟讲，你坐低我自然会拎开㗎啦”，批评“乱咁冤枉人”。
随后有橙色上衣男乘客加入骂战帮忙指责，女子反击“你虾我平凡小女子呀？”，男乘客见沟通无效，出手将胶袋集中摆放，女子紧张上前制止，“你唔好攞我啲嘢呀！我当你偷嘢㗎！”，并强调自己行为没问题，“我一生一世都系合法嘅”。
网民狠批，“强词夺理，真系顶佢唔顺”、“X老横行霸道！不知所谓”、“泼妇！系男人都顶佢唔住”、“边个屋企人收埋佢啦”，又建议“癫成咁，要call职员搞得掂”、“揾EQ哥对付佢”。
facebook流传的影片见到，戴红色头巾、穿白色短裙的女子将3个购物胶袋分散放在车厢3个座位上，旁边有女乘客不满其行为出声指责，女子反驳：
“我自然会拎㗎啦，你理得我啫，我几时有霸住个位呀？你咪坐啰，好似我咁样，坐一半。”
女子坐的座位身后同样放了胶袋。
1人占3座位放胶袋 港铁女否认霸位：你咪坐啰
女子反炮轰女乘客，“喺度多多说话，打横嚟讲，你坐低我自然会拎开㗎啦，你都不知情，喺度乱咁冤枉人，我几时有霸住个位呀？仲有一半位㗎！全世界嘅人都睇到㗎，唔系盲㗎，唔系残废人嚟㗎”。
男乘客帮忙指责兼出手将胶袋集中摆放
随后有橙色上衣男乘客加入骂战，帮忙批评女子的不文明行为，女子站起身反击，“我惊你呀？你虾我平凡小女子呀？”、“我几时有大叫大嗌呀？佢搂我讲嘢咋，你估我想答佢呀？你诬捏诋毁我，话我霸位”，男乘客一度激动爆粗，女子表示“你讲粗口我都唔惊你呀！”。
男乘客见沟通无效，于是出手将胶袋集中放在1个座位上，以腾出空位，女子紧张上前制止，“你唔好攞我啲嘢呀！我当你偷嘢㗎！”，之后自行将3袋物品集中放在一起，又说“你唔好用法例嚟吓我，我一生一世都系合法嘅，做自己喜欢做嘅嘢，lawful（合法的）㗎”。
网民齐轰用胶袋占座女子：
“唉！令人头痛一族”
“真系挑战人嘅忍耐力”
“咁嘅人品佢有冇朋友㗎？”
“位置系畀人坐唔系放东西”
“使X同佢讲咩，一嘢坐落去”
“如果是我，直接把她的东西扫开，然后坐下去”
“难为佢讲得出仲有一半位，𠮶一半位畀边个坐呀？真系正常人嚟㗎？”
“呢啲人呢，唔知衰咗，仲要大声夹恶，错咗都唔认”
“明显佢跳咗掣，算把啦，其实，大家见到呢啲人同佢争拗都嘥气”
“大家闹个癫婆时，都要赞下个英勇男士”
港铁滋扰乘客、说粗口可罚款5,000元
根据《港铁附例》第25条“乘客不得造成滋扰”，任何人不得在列车上或在铁路处所任何部分作出对其他乘客造成滋扰或烦扰行为，违者最高罚款5,000港元。
除此之外，若乘客在争执过程中情绪失控甚至说“粗口”，根据《港铁附例》第28H(1)条，于铁路处所使用任何威胁性、粗秽、淫亵或使人反感的言语，同样可被罚款5,000港元。
（facebook）