电影《PTU》 中的机动部队警长“展哥”何文展，电视剧《新扎师兄续集》 中的大反派高级督察韩彬，都是“华哥”任达华饰演。演绎警察，对华哥来说，有一份与众不同的“基因”，因为他的父亲任锦球及兄长任达荣也是警察，小时候在警察宿舍长大。去年他再与警察扯上关系，因为他在“旧中区警署 ”——即现时大馆，举行《炫目．任达华》画展。

位于荷李活道的大馆由赛马会出资38亿元，保育活化成香港文化旅游法定古迹。任达华接受马会刊物《骏步人生》邀请，在大馆接受访问，谈及他的美学及与马会关系。选这个地方，正因香港电影工作者总会正在此举行《拍住上—光影里并肩驰骋的我们》展览，透过多出经典拍档电影，探索香港不同时代的“团队精神”以及“电影精神”。

“大馆好有包容性，同埋大馆有个承传。”任达华说，大馆有很多不同展馆和很多不同元素，“我旧年就用咗眼睛去做咗元素，个题目叫《炫目》，“即系等于我哋细路仔出嚟嘅时候，第一次开眼嘅时候，眼睛望到呢个世界系点样，估唔到我70岁嘅时候，先至画到呢啲嘢出嚟，呢个等于系一种灵魂嘅存在。”

任达华认为大馆奥妙之处，是容纳到很多不同类型的设计师、画家，甚至本地设计师、本地创作者都可以举办展览，从而令到不同地方的人，都可以看到香港艺术家，“咁我觉得呢个就系一个地方嘅包容！大馆由以前一个建筑群，到依家活化咗，以前年代啲人都走咗，但佢哋一手一脚创造呢个建筑群仍然留喺度。”

任达华的美学观，也是富包容性，“圆月是美，残缺也是美；热烈是美，平淡也是美”，“我觉得每一样嘢都有唔同嘅美，只不过你用咩态度去睇？咁你一部电影、一幅画画咗出嚟，你觉得好靓就系好靓；如果佢破咗佢，即系水墨，即我哋话‘破墨’，破咗佢嘅亦系另外一种味。我就特别钟意红色同绿色，咁如果我觉得幅画入边有绿色同埋红色嘅元素入边，我会特别开心。”

在不同作品中，任达华演绎不同的角色，“每个角色都有唔同角度、唔同质感”，他说人们的皱纹，有很多不同的质感，“唔好觉得有皱纹就系老，有皱纹就会多啲智慧，多条皱纹嘅就等于佢哋入边多一个故事，多一个内容。我哋作为一个演员或者画画又好，或者影相又好，多啲去寻找一种生命嘅来源。”

他会坐电车，去找些来源，“今时今日，我谂大家都坐过电车。电车入边其实有好多不同嘅故事，亦都系香港一个细细地嘅缩影，有爱情嘅故事，有悲伤嘅故事，有两个人坐喺度望住出边嘅故事。”由西环到筲箕湾，变迁了很多，他在一本书中，以慢动作去展示电车入面的动态，“希望大家关怀多啲身边嘅朋友，望落去其实好靓嘅，我哋行出街左左右右，其实只不过我哋时间太过急促，出去嘅时候冇留意，其实每个地方都好靓。”

为拍摄美丽的维港及香港的海岸线，他曾特别租用直升机一日拍摄，“我希望大家对香港呢啲海岸线、维港，呢啲好特别，全世界无一笪地方好似香港咁靓，即系由维港睇落嚟，由九龙睇返去香港，每一吋都有唔同嘅美，因为唔同嘅太阳、唔同嘅时段有唔同嘅美，呢个系香港独特之处。”

任达华眼中的美丽地方，尚有赛马会滘西洲公众高尔夫球场，他过往也曾到过。“既然有一个赛马会咁好嘅球场喺滘西洲，我哋亦都希望喺另外一啲岛上边，做一啲类似其他嘅活动，令到外国嚟嘅朋友、或者香港自己嘅朋友，多啲去𠮶啲地方，就变咗另外一个打卡、另一个生态咁，我觉得应该揾多啲唔同嘅岛，民宿又好，或者系点都好。”

任达华曾个人名义拥有马匹“红当当”，又以“智好友团体”先后拥有名驹“晨曦巨星”及“晨曦英雄”。他“百分之百赞成”赛马旅游，“因为赛马旅游喺国际上边系盛事，不停咁带动新周边嘅食肆又好，茶餐厅又好，一定都系带动到一啲产业链延续 。”

作为马会会员，他说经常有朋友叫带入场观看，“咁我次次礼拜三、礼拜六都拍紧戏，拍剧最痛苦一样嘢就冇假日，你礼拜六日必须要拍戏，因为啲场景系必须要礼拜六礼拜日先至放畀你拍。”所以唯有找朋友带他们入去，“我都希望多啲时间，如果有嘅话就带多啲朋友入去，佢哋个个都好有兴趣同埋好想去感受系一种天地人嘅合一。”

任达华的父亲1969年因公殉职后，一家经济支柱顿失，他其后获得《华侨日报》奖学金，由于报社就在荷李活道，故此每个月都会到大馆附近领取12元交学费，“起码每个月学费都有着落。”

年届七十，华哥说，他仍在学习中，就如AI人工智能，“到依家仲喺度不停学习。我觉得年轻人最紧要抱住学习态度，任何一段时间都要装备自己，去学习多啲嘢，装备自己、摆咗喺自己身边。我哋一定要上上落落、弯弯曲曲，咁先至叫做人生。你丰满咗呢个人生，咁你先至学识第日点样照顾屋企人、照顾太太、或者对社会有责任，所以最紧要一样嘢，就系自强不息。”