COLLAR演唱会｜宁弃自家solo翻唱外语歌 亲解团魂以外两大原因
女团COLLAR一连两场的演唱会《COLLAR “GAME ON” LIVE 2025》圆满结束，完骚后她们回到后台受访，直言唔够喉！陈泳伽（Winka）觉得至少要五场，邱彦筒（Marf）说尤其她们贪心，为演唱会设计了很多，所以当然想开更多场，但目前也觉得很圆满。
COLLAR演唱会｜尾场补清唱《Chosen Family》赠歌迷 Day罕有落泪
COLLAR演唱会爆喊发言全纪录 Ivy：COLLAR每一个都好值得被喜欢
演唱会上有两下动作是COLLAR从台底跳上来，李芯駖在台上都有分享过，她们身上的服饰其实很重，要跳起也不易，沈贞巧（Gao）说七位确实有特登练：“喺个台搭好之后我哋有一齐练咗一整天，逐个跳，试到得为止，试到唔惊为止。”Winka坦言自己之前脚部韧带撕裂，芯駖又整伤膝头，所以都会惊，最终做到都觉得大家好叻。
堪称“放血女团”的COLLAR，不讳言排练和化妆期间又要针炙放血，又要做电疗，Winka甚至说：“On show前一晚瞓唔到，朝头早六点先瞓到，本身个人好down，佢一放咗血我即刻……精神晒！”芯駖则透露医疗团队告知她不能放血，因为她已气血不足，再放会晕。
今次演出COLLAR个个都以弗爆身型示人，当中苏雅琳（Ivy）的腹肌更是超明显，Marf：“佢练出嚟㗎 ！练咗半年㗎喇！”Ivy回应：“系呀，我早半年已经开始同自己讲，我今次演唱会想试吓自己人生最瘦可以去到几多，我就试咗喇，原来系咁样，之后应该去唔返呢个巅峰，可以留念。我人生中最瘦嘅时候，就系24岁嘅《GAME ON》。”队友还笑称，下个演唱会她可以挑战“人生最肥”。七位为演唱会节食已久，如今终于可以解放，Ivy直言：“我真系好想食亚博嘅叉烧！”又表示“葵广团”可以成行。
COLLAR之中已有四位成员出过Solo歌，但今次演唱会她们却没有唱这些歌，每人的Solo部份都选择翻唱其他歌，当中有五首都是外语，讲到这个安排，Gao说：“呢个都系细So一个好有心思嘅谂法，因为佢觉得呢一个系COLLAR团嘅演唱会，所以所有嘅嘢都系想以团行先。”Marf补充：“但系佢都有逐个问我哋，你哋介唔介意，我话梗系唔介意啦！最好㖭呀！好玩吖嘛！我哋可以Focus，同埋我哋觉得唱人哋嘅歌，做一个cover，将一个cover变做自己嘢，其实有一种好美丽嘅事情，同埋因为我哋嘅作品暂时系有限，所以讲到嘅意思未必系有其他人讲（咁好），譬如《You gotta be》呢首歌，我哋系冇有一首咁有Harmony、咁有意思嘅歌，所以我哋意思、画面行先。”而芯駖也很希望整个编排带给大家新意：“我哋又唱solo歌就好估到，所以不如试吓唱一啲唔同，都几适合我哋嘅歌。（许轶Day：估我哋唔到。）”
翻唱曲目中，王家晴（Candy）翻唱Gin Lee的《白夜行》、沈贞巧翻唱Yui的《Goodbye days》，唱功获赞有进步。Candy大赞Gao好厉害，指其余六位成员在后台看著她唱，大家都哭了，“今日大家有少少忍住，我惊阿Gao突然间擘大眼望到我哋佢会喊，所以我哋大家忍住，但系寻日我哋喺后台企后少少，我哋见到芯駖已经泪流满面，然后大家都……我都承认我系有泪流满面，所以我就觉得好感动。”
Candy暂未敢翻睇自己的演出片段，会待完骚后才慢慢看网上评论，在《白夜行》推出时，原唱Gin Lee都说这首歌是史上最难，难度属变态级，问Candy为何向高难度挑战，她透露是自己、Gao、Ivy跟音乐总监Mike Orange去Singing Camp学唱歌时选出来的，她多谢Mike：“佢要我哋揾唔同嘅歌去唱，我拣呢首歌，其实我第一次唱嘅时候，𠮶阵Ivy、Gao、Mike都喺度，佢话其实你几适合唱啲女战士沉着气𠮶种歌，我自己觉得原来呢个都几系我自己嘅性格，然后又讲返篮球节目， 细So都有话佢觉得我𠮶种好沉稳、好有斗志、好坚定嘅眼神，好似一个战士咁样，种种加埋嘅因素，令到自己我觉得我今次想拣呢首歌。”
至于Gao压轴登场是细So忽发其想的意念，在Singing Camp时Mike鼓励她们什么都唱，问她可有熟悉的歌，Gao表示：“呢首歌系我中学嘅时候非常喜欢嘅一首歌，系Yui嘅Goodbye Days，唱完之后佢哋就话几好听㖞，跟住就同咗细So讲，一同细So讲，佢就有咗个咁嘅idea出咗嚟，我觉得几特别呀，好似Fake吓大家咁样，哎呀冇我？咦？原来阿Gao唱㗎？”Gao在演出期间极力保持理性到最后一刻，不想受情绪左右。
讲到Day在台上罕有落泪，Gao就笑说：“ 其实佢唔系好少喊㗎，佢喊嘅点好奇怪咋嘛！”队友听完都大笑，而Day就解释：“系呀，我嘅泪点好奇怪，𠮶刻我望住大家觉得……有一种唔知几时会再见到大家嘅感觉，𠮶刻系好感触嘅，因为我哋企咗喺个高嘅台度，每一个fans都望到嘅角度，大家一齐大合唱嘅时候，就真系好触动到我。”
演唱会尾声讲感言的部份，芯駖、Winka、Ivy都有爆喊，Ivy哭得最厉害，问她为何如此感触，Marf即说：“劲靓呀喊得！点解喊都可以咁靓嘅？”Ivy则问她“你见到？点见到？”芯駖解释自己头场听到Gao唱歌已开始喊，回想起很多片段：“我觉得我哋都好叻啰，我哋好多时都逼得自己好紧，我会觉得，但系我哋好似有好多嘢都会可以挨过，例如我哋好多嘢都系互相帮忙，唱歌例如唔叻嘅，我哋成日都问Winka，Winka又会教我哋啲口型要点，阿Gao其实系好难做𠮶个位，你要挨晒成场show，最尾最尾先唱一首solo歌，仲要咁高音，系能够完成到，我觉得我哋系合力将所有可以有嘅资源都用晒落嚟完成到呢件事，唔系净系我哋，系我哋成个团队，𠮶个moment好感动，冇办法唔喊。”
Ivy则表示：“我觉得成个过程入面见到大家劲搏命，我哋一个月时间练自己嘅歌，都排咗好多新嘅Step出嚟，系咁挑战个极限嘅时候，见到大家整亲晒，见到大家想将最好嘅嘢俾到Fans俾到观众，而观众喺今日都真系将佢哋最好嘅尖叫声，最好嘅反应，最好嘅爱都畀晒我哋，所以𠮶下真系超感动！同埋今日都好多朋友嚟咗，台下最尾𠮶part著咗灯嘅时候，见到佢哋个样就真系觉得好感动。”
Winka又特别鸣谢监制细So：“佢系好愿意听我哋讲有咩想做，有啲咩想archive，同埋有咩要改佢即刻好welcome，唔会话‘我已经set好咗喇，唔改喇，唔改喇。’佢系好想令到我哋都好into呢件事。”Marf续说：“虽然咁样系会令到大家个workload的确增加咗，但系我哋真系好感恩，肯为我哋增加workload嘅人，无论佢哋定我哋定观众，睇到作品之后都会觉得值得咁样。”芯駖总结：“我觉得佢哋唔系净系做我哋演唱会，我觉得佢哋系想将一个演唱会个可能性睇吓有几多，究竟香港演唱会，一个女团，我唔知史上有冇女团做过……其实我哋都系好多嘢冇试过，都唔知得唔得，大家都系想试，都系想创新啲。”