草蜢“GRASSHOPPER THREE IN LOVE CONCERT草蜢演唱会2026”新加坡站，周末（20/6）于新加坡室内体育馆顺利完成，全场爆满，座无虚席。草蜢表示特别将40周年世界巡回演唱会海外首站选在新加坡，因为恩师梅艳芳第一次带他们出埠演唱就是新加坡，意义重大。更惊喜是台下有Fans当年有入场睇梅姐演唱会，见证草蜢1986年处男登台！

草蜢想将舞台献俾师傅

阿智台上说：“我哋草蜢世界巡回嘅第一站要拣新加坡，因为呢度对我哋三个好有渊源，我哋第一次跟梅姐出埠，就系嚟新加坡！”全场欢呼。杰仔问：“边个1986年有嚟睇梅艳芳演唱会？”台下有Fans举手，草蜢好惊喜。阿智说：“没有梅艳芳就没有草蜢，所以我哋想将呢个舞台献俾我哋嘅师傅梅艳芳，多谢佢当年带我哋嚟到新加坡认识大家，我哋要揾返我哋嘅初心，多谢你哋支持草蜢40年！”

苏志威感谢Fans第一时间买飞爆满

苏志威说：“好多谢你哋一知道我哋要嚟开演唱会，第一时间买飞，好早就卖爆晒，多谢你哋嘅支持，为我哋世界巡回打咗第一支强心针！”观众反应非常热情，完场后乐队已退场、观众席开了灯，仍不肯离开，大嗌encore。草蜢一边戴耳机一边行返上舞台，阿智说：“你哋仲唔走？啲歌真系唱晒啦！”杰少说：“Band都走晒㖞！”阿智说：“我哋下一站去马来西亚，你哋挂住我哋就嚟啦！”然后他们演唱《暂停·开始过》，并向所有Fans挥手道别。

私心特选新加坡做世巡第一站

演出后草蜢接受访问，阿智说：“真系非常、非常、非常多谢新加坡嘅Fans，好热情！40年前梅姐带我哋第一次到海外登台就系新加坡，20岁仔人生第一次搭飞机，所以我哋对新加坡有情意结，私心要拣返呢度做40周年演唱会嘅巡唱第一站。刚才有Fans举手话86年有睇梅艳芳演唱会，睇过我哋表演，真系毛管戙啊！”

虽说新加坡观众比较内敛，但草蜢的Fans特别热情，阿智说：“好少会开晒大灯都唔走，呢啲‘真encore’，盛情难却，其实我哋三个都唔舍得走！现场澎湃嘅欢呼声，好似喺球场睇‘世界杯’比赛咁劲！”

新加坡站三面台不一样的震撼

杰少表示开心见到来自世界各地Fans专程飞到新加坡捧场，说：“好多Fans睇过香港站演唱会话正，话要再睇，特登飞嚟睇！”阿智说：“佢哋就醒目啦，香港红馆四面台，嚟到新加坡三面台系有另一种感觉，感受到制作团队嘅心思，不一样嘅震撼！”苏志威说：“好多朋友话睇完今晚新加坡站想继续睇，咁就要扑马来西亚站嘅门票。”

新加坡站加设传波波游戏全场玩得劲开心

除了草蜢演唱会“传统”与观众玩人浪，今次新加坡站加设观众传波波游戏，全场玩得劲开心，气氛超好。阿智笑说：“知道好多Fans平时读书、返工，冇时间做运动，所以加咗‘碰碰波’游戏，掂到个波嘅Fans都得到草蜢嘅爱。至于马来西亚站都有新花臣，依家申请紧，希望成功，大家到时感受一下我哋为大家准备嘅心意！”而香港演唱会的“情歌盲盒”环节亦带到巡唱，每晚不同惊喜，今次新加坡站演唱《我们都是这样失恋的》和《永远爱着你》。

蔡一杰爆彩排后食宵夜遇扑飞失败母子

杰少透露前一晚彩排后去食宵夜，遇到一位廿四孝妈咪，她见到草蜢后即通知两个囝囝飞车赶到大排档见偶像，他们表示因为扑飞失败，无缘入场感可惜，好彩场外偶遇，更得到草蜢在他们的tee上签名留念，非常开心。阿智扬言在新加坡食到超好味海南鸡饭，期待马来西亚食肉骨茶和榴梿。