以蒙面身份，动物造型参与“中年好声音4”的“企鹅人”周志康、“狮子王”罗天宇、“猫女郎”刘佩玥、“白羊君”姚兵、“白眉鹰王”莫家淦、“树熊公子”黄建东早前宣布将于9月30日晚上8时正，在麦花臣场馆举办《爱爆动物音乐秀》，票价分别为$1380 (VIP，福利包括可观看彩排、和6位歌手合照)、$980、$680，优先订票经已全部售罄，为免向隅，敬请密切留意8月28日在Cityline的公开发售。

6位蒙面歌手在“中声4”的表现均令大家眼前一亮，为乐迷带来惊喜，获得不少粉丝追捧支持，他们今次有机会站在另一个更大的舞台上再度发挥自我， 为大家献上最精彩的演出，让大家更加认识他们对音乐的坚持和努力。

周志康重温初衷期待合体

周志康表示非常开心《爱爆动物音乐秀》的出现，“因为经历咗整整差唔多一年嘅比赛，途中有唔少fans问几时会开show，终于可以俾个日期佢哋。见到我哋今次音乐会动物歌手嘅阵容，亦都令我谂返起当初大家参加呢个比赛嘅第一日，大家战战兢兢好俾心机去练歌，各自为自己嘅舞台努力。今次大家可以再为属于大家嘅音乐会共同努力，有另一种意义，加上其他5位都系自己嘅好朋友，所以好期待今次音乐会。我希望唱多啲好歌俾大家听，回馈返呢段时间一直支持我嘅歌迷。”

罗天宇坦言止步24强更珍惜难得舞台

罗天宇好开心有一个属于他们动物歌手的机会，“其实系参加比赛嘅过程中，我哋基本上系冇以一个组合形式去代表动物歌手唱歌，所以真系好期待可以一齐大合唱。另外如果唔系公司俾咗我哋参加《中声4》嘅机会，我相信自己都冇机会可以成为呢个音乐会嘅其中一份子，再加上自己喺24强止步，一直都希望可以有更多机会再去唱歌俾大家听，所以自己好珍惜嚟紧系音乐会所参与嘅每一部分。”

刘佩玥持之以恒锻炼身心

刘佩玥感谢大家一直以来对她的支持和鼓励，“好感恩由大家喺我参演嘅剧集角色中认识我，到今次可以喺《中声4》嘅舞台上再发现我唔同嘅一面。虽然比赛已经结束，但因为我好热爱音乐，好钟意唱歌，所以一直都继续好努力咁去练歌同练琴，亦有学习音乐创作，当然唔少得一直要keep住身心嘅健康状态、做运动无得临急抱佛脚，要好自律同持之以恒，所以依家都keep住锻炼自己，唔单止为咗上台表演著衫好睇，而系将好嘅状态一直keep住，咁就做咩都会更得心应手。”

姚兵直言开骚是参赛的最大肯定

姚兵兴奋说：“可以开音乐会系对我今次参加《中声4》嘅一个肯定，我觉得呢个音乐会好特别，用动物园嘅概念同身份嚟参加，我记得上一次喺我身上有啲热度出现就系《星梦传奇》，但都已经系十几年前嘅事，当时完咗比赛之后都冇特别举办音乐会，所以今次有呢个机会真系好开心，好期待同大家喺舞台上见面。”

莫家淦遭淘汰无阻追梦步伐

莫家淦表示自入行以来，一直渴望能够得到更多唱歌的机会，“首先衷心多谢《中声4》，给予我一个专属歌唱嘅舞台。每个周日都可以企系台上唱歌，同大家分享音乐，已经系好大嘅福气。令我更惊喜开心嘅系后续仲有一场《爱爆动物音乐秀》，呢个宝贵经历，亦令我距离歌手呢个身份再迈进一大步。虽然我喺《中声4》止步淘汰，但我从未放下做歌手嘅梦想。追梦之路唔会停低，往后我会继续坚持，做属于自己人生嘅主角。”

黄建东大展弹琴写歌才华

黄建东说：“其实由细到大都有弹琴同写歌，音乐一直都系我嘅梦想，谂唔到因为参加《中声4》有机会参加呢个音乐会，希望到时弹琴唱歌令到观众认识一个不一样嘅黄建东。”

6人宁牺牲睡眠时间全力备战

周志康、罗天宇、刘佩玥、姚兵、莫家淦、黄建东表示无论在比赛中是赢或输，梦想是不会变也不会停。现距离《爱爆动物音乐秀》只余下一个多月时间，六位歌手也早有其他工作安排，但他们异口同声说宁愿牺牲睡眠时间，也要把今次演出做到最好，希望大家能够为他们在音乐会中所付出的每一分力而感动。