宣萱昨日（16日）现身品牌限定主题店开幕活动，讲到早前与古天乐拍广告并开金口合唱《无时空之恋》，宣萱不讳言唱歌比拍咀戏大压力好多，录音时简直压力爆表，更怕一个好广告毁在自己身上，大爆：“有首歌之后，我同经理人讲点解咁高音嘅？我唱唔到，佢话已经降咗两个Key，我话‘吓？咁试吓唱啦！’要唧起把声。”不过今次之后她想找老师精进歌艺，不但透露有机会在古天乐演唱会上与对方合体，更自爆想学Rap！

生日会加开名额 仍难满足所有fans

已有一段时间没有出席公开活动的宣萱，获不少Fans到场守候，她表示幸好8月有每年都举办的生日会，但虽然已将参与人数由130人增至190人，但始终无法满足所有想出席的fans，也有部份支持者表示很担心抽不中名额：“其实都只可以咁上下，好多人想参加，但系你又希望俾多啲时间，因为我会逐台同佢哋倾偈，又会玩游戏、好多嘢。”

拍广告导演临场加插与古天乐世纪激吻环节：希望大家睇得开心

讲到早前跟古天乐拍广告及出歌，她也觉得很高兴：“我觉得可以喺演艺生涯拍到一个咁嘅广告，因为我脑里面成日觉得，系铁达时，我哋细个嘅时候，第一次见到个广告有故事性、好感人，但系冇谂过自己有机会。”她又透露咀戏是导演临时加，自己埋位时先知，但只要剧情有需要她就会做，所以十分爽快答应：“初初都剩系得一个shot嘅啫，初初净系沙滩𠮶度，突然间去到晚装，唔知点解导演又话不如咁㖞，我话‘好呀。’”拍摄时他们咀了分几钟，宣萱笑言：“我个脑都谂紧，仲唔cut嘅？因为个摄影师系handheld，不停围住我哋，我谂导演睇到有佢要嘅Shot佢先会嗌停。”不过她与古生早有默蚀，相信对方冇乜所谓，表示：“因为合作得太多，最紧要睇件事，成件事系会完整，同埋好完美，你拍一个广告都希望除咗有draw之外，都希望睇得开心。”

录音四日压力爆表 怕自己歌喉差搞砸成品

虽然咀戏轻松完成，但宣萱就不讳言唱歌才是最大压力，录音的四日可用“压力爆表”形容，更谓：“我直程人生冇试过拍一个广告咁大压力！唱歌都系后尾话俾我哋听要唱，但系我觉得系一个……喺演艺生涯里面有一个咁嘅机会，拍到咁样，再唱埋歌，系好难得，所以一定会做。”她指唱歌是最后才进行的步骤，但前面见到广告拍得很好，反而使她更担心，怕自己把事情搞砸。宣萱又笑说：“时间好短，我要洗脑式听熟首歌，到有首歌之后，我同经理人讲点解咁高音嘅？我唱唔到，佢话已经降咗两个Key，我话‘吓？咁试吓唱啦！’要唧起把声，我又唔识监制Gareth，我未见过佢，好紧张，成个人去到第一日录到好少嘢，我知佢好似氹细路仔咁，尽量同我倾吓偈，‘你要唔要食嘢？要唔要饮嘢呀？’等你放松啲，我直程叫我经理人可唔可以唔好去，我仲记得第一句录嘅时候，我喺玻璃见到佢两个坐喺度，我直程望住佢两个，我唱唔到。咁我问佢可唔可以遮住，佢话得得得得得，咁就帮我将啲嘢褪位。佢话我帮你熄灯，我话唔好，我要睇到啲歌词嘅。我都要尽量执，后尾古仔录𠮶时，佢话for佢，佢唔够，佢要再遮多啲。”

自评歌艺勉强合格 预告有机会与古生红馆合体：想学Rap

问到宣萱会畀自己歌艺几分，她思索一会：“哗，勉强合格啦，但唔系好啰我觉得。”至于古生的歌艺，她则笑问：“可唔可以唔答？咁我哋两个都唔系歌手，我觉得OK啦，我谂观众听众都唔会有𠮶个要求。”不过古生日前宣布将举行红馆演唱会，很多观众都想见到两位同台首唱《无时空之恋》，她只简单说：“去到咪唱啰，睇下我去唔去到。因为原本打算开完生日会，放假去旅行，所以要调节下啲期。”宣萱指今次录音前其实有临急抱佛脚找老师学唱歌，上了三小时课，都觉得有所得著，所以有意再学，更惊爆：“我好想学Rap！”记者建议她请教同场的Tyson Yoshi，她说：“我知呀，有一日我都问监制，我话我好想Rap，佢教咗我，佢话Rap一定要有态度，你唔可以用一个正常Jessica把声去录，你要搞到唔似你把声。所以我都喺度谂紧，好羡慕啲人识Rap，我觉得要做多啲唔同嘅嘢。”至于会否跟Tyson Yoshi合唱，她表示：“我惊佢唔好意思推我，但系又唔想难为自己，我都唔敢问佢。”