刁佬好耐冇落笔，但见到而家市场热到爆炸，一堆新科技公司争住喺香港上市，简直似墟市开锣，人人抢头香。

其中最值得拎出嚟讲，当然系《上市规则》第十八C章——专为“特专科技公司”设立嘅通道。呢章将申请人分两类：已商业化同未商业化，只要从事以下五大范畴之一就够：

-新一代资讯技术（云端、AI、元宇宙）
-先进硬件／软件（半导体、机器人、自动驾驶）
-先进材料（纳米、超导）
-新能源／环保（氢能、光伏、废物处理）
-新食品／农业科技（合成肉、基因作物）

光睇呢啲名，已经够科幻，好似睇科幻片咁。

现时有7间公司靠18C成功上市：晶泰科技（2228）、黑芝麻智能（2533）、越疆科技（2432）、云迹科技（2670）、滴普科技（1384）、文远知行（800）、希迪智驾（3881）。除咗黑芝麻同文远知行系搞自动驾驶，其他几间都算交到功课。

最核爆嘅系——“唔使有盈利，甚至唔使开张都可以申请”，只要上市前有2-5个“领航投资人”肯注资就得。即系话，只要你老板口才好、概念够吸引，有人肯陪你玩、肯烧钱、肯搏命，你就有机会冲上主板。

以前上市，睇盈利能力、睇资产、睇模式、睇行业前景——一切为咗保障小股东。简单讲，系数学题。但18C呢条路，简直系玄学题。

多数18C公司上市时仲在亏钱，但市值要冲到40-60亿港元。睇似风光，实则背水一战——后栏火烧紧，前头冇水扑，后果你都谂到。

点解会有2-5个有钱人肯撑你？刁佬只能用小人之心度君子之腹——咁大笔钱，唔系真系睇中你嘅技术，而系睇中你嘅“故事”同“退出机会”。

你有冇发现？所有18C公司上市后，股价都波动到飞起，简直大炒特炒。火中取栗，利在险中求，大家都心知肚明。如果投资者嘅钱唔系自己嘅，但赚到有分红、有绩效，你话会唔会搏多啲？

所以呢类“值博率高”嘅项目，基金最钟意——有故事、有概念、有想像空间，唔使等盈利，先炒先赚。

究竟系上市公司画大饼，定系领航投资者将基金“厨余”转废为宝？时间先会给答案。18C系唔系玩完即弃嘅玩具，定系真系为科技公司开嘅特别融资通道？等过几年再睇。

讲到新科技，刁佬反而钟意“旧科技”——旧科技经得起市场考验，有盈利、有客户、有生存能力。高新科技？似曾相识——2000年dot.com泡沫，一堆公司凭概念上市，到而家仲留低嘅，屈手指都数得晒。

刁佬前几日同个保荐人老友吹水，问佢点样先算符合18C？佢坦白话：“我识条铁咩？高新特殊科技㖞，我都识就唔系高薪科技啦，最紧要系有金主肯注资、比钱开工、递咗表先讲。”

而家好多保荐人用“里程碑收费”——递表系其中一个收大钱嘅关口。现时递表嘅公司十几间，大部份连第一条哲学题都过唔到：“你点解符合18C？”

现时招股书，十之八九由律师执笔。一般业务模式，靠行业顾问帮手，尚算有迹可寻。但去到最新科技？律师唔识，顾问都未必明，有些技术根本未出街，点用文字演绎？

有人问：“叫I Banker写得唔得？”刁佬只能无奈答：“唔得啰！”

而家啲Banker，封笔廿年都唔止，长江后浪推前浪，前浪都冇做廿年，点叫后浪写招股书？

加上而家人人用AI，连篇通告都写到鬼见愁，更何况招股书？你上次有印象嘅香港小说家系边位？相信唔系返咁上下年纪，都讲唔出。

18C系推进新科技嘅巨轮？定系揠苗助长嘅产物？刁佬倾向乐观——呢个系“养蛊”修罗场。市场用资金推科技，以“一将功成万骨枯”方式，等下一个Elon Musk出世。

呢班未盈利嘅公司，获过千倍认购，估值爆灯，正正反映“众人拾柴火焰高”。时代巨轮难以抗拒，但如果你系轮下堆被压扁嘅烂泥——就真系尘归尘，土归土喇。

【财经专栏】刁场奇幻录．刁佬

简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。

免责声明︰

以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。

另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。