如果李嘉诚今年 30 岁，身处于 2026 年这个大时代，你估佢第一时间会买咩？

买楼？我觉得未必。喺今时今日地产周期转型、高息环境持续嘅大气候下，传统“买地建楼”嘅高杠杆玩法。

咁去追新科技，买最热门嘅 AI 股？有可能，毕竟超人旗下嘅维港投资（Horizons Ventures）一向对前沿科技情有独钟。

但我总觉得，以李超人一生做生意嘅敏锐嗅觉同轨迹，佢未必会好似一般散户咁，盲目追住市场上最热、市盈率炒到上天嘅概念股跑。

因为纵观李嘉诚过去几十年嘅财富帝国版图，佢最成功、最核心嘅投资，从来都唔系某一种特定嘅“产品”，亦唔系单纯靠一两件爆款商品去赚取短期的暴利。

超人真正厉害嘅地方，在于他一早看穿了商业世界嘅终极秘密——他投资的是“入口”。

长和系的底牌　其实是“收买路钱”

很多人对长和系（长江和记）有种刻板印象，以为佢最值钱、最依赖嘅资产一定系香港或者内地嘅地产项目。

其实不然。如果你翻开长和嘅财务报表，细心分析佢嘅全球资产配置，你会发现真正为呢个庞大帝国源源不绝提供稳定现金流嘅，系那些隐藏喺日常生活背后、你想避都避唔开嘅基础设施。

港口、货柜码头、欧洲电讯网络、英国水务与能源基建、零售网络（屈臣氏）……这些资产全部都有一个极其强大嘅共通点：无论你钟意定唔钟意，你嘅生活都必须经过佢。

贸易商要出海，货柜就一定要经过佢嘅码头；现代人要上网、打电话，就必须通过佢铺设嘅光纤与基建；民生要煮饭开灯，电力同燃气就要经过佢经营嘅电网与管道。

真正值钱嘅，从来唔系输送管道入面嘅货物或者资源本身，而系“管道”本身嘅控制权，名正言顺地向每一个路过嘅人“收买路钱”。

SpaceX的本质　下一个文明入口

正因为管道嘅重要性，当我最近观察Elon Musk旗下嘅SpaceX发展时，我脑海中开始浮现出一个几有趣嘅谂法。

好多普通投资者或者大众媒体，直到今日都依然将SpaceX归类为一间“航天公司”或者“火箭制造商”。但我愈睇数据、愈分析佢嘅商业布局，就愈觉得事情冇咁简单。马斯克可能根本唔系想做一间卖火箭发射服务嘅公司，佢真正做紧嘅，系人类文明再进化、走向跨星球时代嘅唯一入口。

事实上，今日嘅SpaceX已经行到去一个临界点，佢内部嘅商业生态极其庞大。如果我哋将佢拆开嚟睇，佢其实同时运行紧五盘逻辑严密嘅大生意：

一、Falcon（猎鹰系列）

你可以将 Falcon 视为“太空版嘅 DHL”或者“宇宙物流巨头”。只不过佢送嘅唔系普通包裹，而系重量以吨计嘅卫星与科研仪器。凭借无人能及嘅“火箭回收重复使用”技术，SpaceX将发射成本压缩到同行难以企及嘅超低水平。而家佢嘅客户名单包括美国 NASA、美国国防部、全球各大商业卫星公司，甚至包括自己嘅Starlink。基本上，现时全球每发射几枚火箭，就有绝大部分出自SpaceX。每发射一次，佢就稳袋一次“物流费”。

二、Dragon（载人飞船）

Dragon负责载人与高价值物资往返国际太空站。以前，这种将人类送上太空嘅能力，系只有中美俄这种超级大国嘅政府力量先做到嘅事。而家，SpaceX以一间私营企业嘅姿态彻底垄断咗美国嘅载人航天市场，客户主要就系NASA同美国政府。这种关乎国家战略地位嘅任务，每完成一次，不仅能收取极其丰厚嘅利润，更确立咗其不可替代嘅政治与商业地位。

三、Starlink（星链）

Starlink嘅商业模式就更加简单直接。你可以当佢系“天空版 PCCW”或者“天空版中国移动／Vodafone”。用户只需要买一个地面接收器，然后每个月乖乖交月费，就可以享受到覆盖全球每个角落嘅高速卫星上网服务。截至目前，Starlink嘅全球活跃用户已经突破一千万，每年产生过百亿美元嘅现金流。呢盘生意最重要嘅地方，在于佢拥有极高嘅用户黏性与惊人嘅规模效应，系现时SpaceX内部最稳定、最赚钱嘅“现金牛”。

四、Starshield（星盾）

Starshield 则系 Starlink 嘅军用高级定制版。佢嘅客户唔系普通消费者，而系美国军方、情报机构以及国防部。用途涵盖了军事级安全通讯、导航增强、即时卫星监察以及无人机／导弹嘅远程控制。呢类关乎国家安全嘅生意，通常毛利率极高，而且一旦建立信任，客户根本唔会、亦唔可能轻易转换供应商，形成了牢不可破嘅政经护城河。

五、Starship（星舰）

至于备受瞩目嘅 Starship（星舰），今日基本上冇为公司带来任何实质收入，相反，它正在吞噬著极其巨大、天文数字般嘅研发成本。点解要咁做？因为Starship根本唔系为今日嘅市场而设计，它是为了五十年后嘅人类世界而存在。如果Falcon系负责送卫星，Dragon系负责送太空人，咁Starship真正想运送嘅，其实系“一整个文明”。

用旧世界的尺　量不到新世界的入场券

听落去，“运送文明”呢四个字好似好科幻、好夸张。但马斯克从来冇隐藏过自己嘅终极野心——佢最终想做到嘅，从来唔止系帮人发射火箭赚取微利，而系要将人类彻底变成一个“跨星球文明”（Multi-planetary Species）。

然而，所有伟大梦想喺商业世界嘅一开始，都会面对同一个巨大嘅难题：冇人知道呢个梦想究竟值几多钱。

这就正如当年哥伦布带领船队冒险出海嘅时候，欧洲嘅王室同商人冇人知道那片遥远嘅“新大陆”未来会值几多钱；当世界第一条铁路喺英国出现嘅时候，当时嘅马车伕与地主，亦冇人能想像到由铁路网交织出来嘅工业革命价值几多钱；甚至到咗90年代互联网刚兴起之时，大部分华尔街大亨同样无法理解，一个只有几行字嘅网站域名，凭咩可以价值连城？

这是因为每一次面临文明跃进嘅关头，人类都总系习惯用“旧世界嘅尺”，去量度“新世界嘅维度”。拿著马车嘅速度去量度火车，拿著实体报纸嘅发行量去估算网络流量，结果往往都量错得离谱。

所以，好多财经分析师成日话SpaceX嘅估值好贵、泡沫好大。我对此并不反对。如果单纯用今日嘅盈利能力、用现有嘅市盈率（P/E Ratio）去死板地计算，佢现时嘅估值确实系贵得令人咋舌。

但问题嘅核心在于：市场对SpaceX嘅定价，买嘅根本唔系今日，亦唔系出年嘅财报，市场买紧嘅系一个历史性嘅假设。

试幻想一下，如果未来有一日，火星上真的出现了人类嘅第一个定居城市，出现了第一间医院、第一间银行、第一间餐厅，甚至诞生了第一个在火星出生嘅新人类。

到时候你再回头看今天的历史，你会突然恍然大悟：SpaceX根本唔系一间造火箭嘅科技公司。

因为到时火星上每个人要呼吸嘅氧气要靠佢运，建设城市嘅重型设备要靠佢送，救命嘅药物要靠佢维持供应，与地球母星联络嘅通讯要靠佢提供，甚至连源源不绝嘅新移民，都要靠佢嘅星舰运送。

到了那个时候，佢所掌握住嘅，就唔再系单纯嘅火星资源或者航天利润，佢掌握住嘅，是整个人类文明走向宇宙、再进化嘅绝对入口。

很多人企图用今日Starlink赚到嘅几十亿月费，去精算SpaceX未来值几多钱。但 Starship 嘅真正价值，从来都唔存在于今日嘅坐标系里面。

如果这个计划失败了，它当然只会成为人类历史上一个烧掉无数资金、沦为笑柄嘅疯狂火箭计划；但反之，如果它成功了，它就是人类历史上第一次跨越星球、开辟新纪元嘅伟大起点。

到了那个时候，你会发现，市场今日赋予SpaceX嘅庞大估值，投资者买嘅根本唔系火箭、唔系卫星、甚至唔系Starlink嘅月费收益。

大家买紧嘅，其实是人类文明下一次历史性跃进嘅唯一入场券。

如果李嘉诚今天30岁，你估佢又会做出点样嘅抉择？

【财经专栏】凌和游戏‧凌凌八一个风度翩翩嘅小股东、老板仔，长年穿梭世界各大城市，见识过资本的贪婪、人性的杠杆，亦曾参与市场上的零和游戏。日常最大嘅乐趣，就喺系漆黑股海中，寻找萤火虫s。

免责声明︰

以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。

另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。