灯神近排光顾谭仔米线嘅时候，不禁谂起谭仔谭氏家族当年卖盘真系“过咗海就系神仙”，2017年家族将金蛋“谭仔云南米线”同“谭仔三哥米线”分别以约10亿及约11亿卖畀日资，一举套现咗约21亿元。不过时至今日，香港经济低迷、餐饮业遭遇寒冬，卖盘后嘅谭仔生意似乎麻麻地，今年集团私有化前披露的年度纯利大跌32.7%，更显得谭仔家族当年卖盘决定，绝对系“完美上岸”嘅示范。

然而，谭仔家族拎住啲钱转身扫入香港砖头，点知几年后楼市逆转，二手传统屋苑、豪宅、工商舖物业等纷纷大插水。呢个情况犹如一个现实版嘅黑色幽默，当初卖盘风光避开餐饮业困境，今时却一头栽进楼市冰河时期。谭仔家族到底应该笑当年走得快，还是喊今日蚀得多？

谭仔家族地产连环蚀　本舖豪宅齐变“蟹货”

谭仔家族成员最近喺地产市场真系动作多多，可惜斋做蚀本生意，舖位同豪宅都纷纷沦为“大闸蟹”，急急脚掟货，最夸张系天水围嘉湖新北江商场两个地舖。其中一个舖位，家族“四妹”谭艳萍同“五哥”谭泽均2012年用成3,680万买入，今年初竟然以1,100万“贱卖”，一野冇咗2,580万，蚀到得返三成价！另一个新北江舖位都系惨淡收场，“四妹”谭艳萍今年5月份用1,600万卖俾对家“云桂香米线”，比起2013年4,300万嘅买入价蚀足63%，一铺清袋2,700万。

舖位见血，而住宅一样系“泥菩萨过江”。“六哥”谭泽强持有嘅尖沙咀名铸两房单位，揸足七年都要损手离场，最近硬蚀720万沽货。而“四妹”谭艳萍放售嘅名铸四房大单位更加夸张，2018年用1.61亿高价入市，去年中只能以1.5亿割爱，帐面冇咗1,100万，睇见都肉赤。

↓↓四妹谭艳萍去年1.48亿沽名铸高层B室↓↓

谭仔家族早以21亿卖盘　本土米线变身日资品牌

大家可能会谂，系咪谭仔生意唔掂，所以要卖楼周转？错啦！其实谭仔家族早就“上岸”——原来佢哋喺2017年已经将“谭仔云南米线”同“谭仔三哥米线”卖咗俾日本企业。换句话讲，而家大家食紧嘅谭仔，其实系“日资谭仔”嚟㗎。

灯神睇返旧资料，“谭仔云南米线”呢个本土品牌始于1996年，由谭氏家族嘅三哥谭泽群同六弟谭泽强创立，之后其他家族成员陆续加入。由于成员之间出现分歧，2008年正式分家：五哥同四妹继续经营“谭仔”，三哥同六哥就开咗“谭仔三哥”。

直到2017年，日资“丸亀制面”母企东利多控股以约21亿收购两个品牌。新东家入主后，喺2021年以“谭仔国际”名义合并上市，曾经分家嘅谭仔米线，戏剧性咁又走返埋一齐。

一朝卖走米线王国　家族进军楼市扫豪宅盘

卖咗米线王国套现21亿，谭仔家族真系猪笼入水。有咗弹药，自然要谂点样“钱揾钱”。对传统香港富豪来讲，有咩实净得过砖头？于是，家族成员喺卖盘翌年，齐齐入市买砖头。灯神翻查成交资料，首先入市嘅喺谭仔“五哥”谭泽均同太太邱美凤，2018年2月情人节当日豪掷1.68亿购入九龙又一村海棠路洋房，实用呎价高达41,843元。

“三哥”谭泽群同太太陈淑仪亦唔执输，喺2018年7月斥资5,620.2万买入旺角晓珀‧御一伙低层复式单位，呎价接近2.9万。其后两人喺同年10月再加码，以7,000万购入同一屋苑高层连天台特色户，呎价高见36,194元，当时售价同呎价均创项目新高。由于持有多个物业，二人要俾双倍印花税（DSD），涉资1,050万元。另外，三哥更斥资1,200万大手购入四个车位。单计晓珀‧御嘅物业同车位，涉及金额已经高达约1.4亿。

同年8月，“四妹”谭艳萍亦有大手笔，斥逾1.6亿购入尖沙咀豪宅名铸高层B室，成交呎价高达54,187元。“六哥”谭泽强亦紧随其后，以4,100万购入名铸一伙两房户，呎价约39,806元。

楼市回落两成　沽货累蚀118万碗谭仔米线

不过灯神参考返中原城市领先指数CCL，在2018年2月初约为168点。睇返7年几过去，截至今年10月中旬，中原城市领先指数CCL为140点，即期间楼价下跌近两成。灯神留意到，六哥同四妹可能想沽货止蚀，近期陆续卖走上述名铸两伙单位，合共帐面蚀咗1,820万。

连同其他家族成员今年蚀卖嘅两个新北江商舖，灯神计过条数，呢四单交易蚀嘅钱加加埋埋，谭仔家族总共蚀咗7,100万！以一碗谭仔云南米线约60蚊计，呢个数够灯神食超过118万碗，由朝食到晚都要食足大约1,622年先食得完。

低价私有化谭仔　东利多高卖低买变相赚

另一边厢，谭仔国际近期亦有大动作。日本大股东东利多控股今年2月提出以每股1.58蚊私有化公司，到8月正式搞掂。不过灯神同大家计计数：2021年谭仔国际IPO系每股3.33蚊，而家私有化价连招股价一半都唔够，真系贱价回收。而当年谭仔上市集资10.42亿，现时大股东只用最多5.56亿就私有化成功，另外公司仲有13.4亿净现金，灯神估计，东利多一番高卖低买，帐面变相“赚”咗。

纯利大跌三成有多　谭仔困局映照香港餐饮寒冬

谭仔家族系咪当初唔卖盘好过？灯神睇返谭仔国际私有化前嘅业绩，都几令人担心。2024至25财政年度纯利大跌约32.7%至7,984万元，真系跌到阿妈都唔认得！谭仔喺年报亦都“大吐苦水”，指本港经济疲弱及北上消费成风，令香港餐饮业竞争加剧，集团要加大折扣同推广力度迎战，令经营利润萎缩。灯神都忍唔住慨叹，虽然东利多透过私有化看似有赚，但谭仔嘅营运挑战确实唔细。

讲到尾，谭仔嘅处境就好似香港餐饮业嘅缩影。近年香港经济环境不景，市民消费降级及纷纷转向北上消费，即使强如谭仔嘅本地餐饮龙头，亦难以抵挡结构性消费模式转变嘅冲击。呢个唔单止系谭仔嘅困境，更加系好多香港餐饮同零售企业面对紧嘅难题。

从上岸到遇溺　他朝君体也相同

睇返成个故事，谭仔家族虽然“上岸”成功，却在投资路上遇溺。而接手日资虽然资本操作上有著数，却要面对香港餐饮市场嘅结构性困境。无论系卖盘嘅谭仔家族，定系接手嘅日本企业，都在呢个变幻莫测嘅市场中各有各修行。

灯神谂深一层，系如今香港低迷嘅经济大环境下，谭仔家族无论卖唔卖盘，实情恐怕都喺“他朝君体也相同”。灯神估计，佢哋而家可能系“笑住咁喊，喊住咁笑”，话晒当年都套现咗廿亿，虽然物业投资损手，但起码叫做“有本钱蚀”。