灯神最近食花生食到一单楼市奇闻，听闻仲“阴风阵阵”。话说大埔康乐园有间洋房，正正就系当年轰动全港“三尸劫杀案”𠮶个单位，对上一次转手已经数到2004年，点知上个月竟然拎出来拍卖，开价1,180万元。

咁多年来都被外界冠上“超级凶宅”，所以头两次拍卖都无人吼，因此业主最近就狠狠劈价200万。不过正当准备第三轮拍卖𠮶阵，竟然有人静鸡鸡提前接货，成交价1,028万。不过灯神揿计数机一睇，哇，比估价平足八百几万，差不多打个五折！睇来香港楼市，最紧要个价够靓，只要够平，凶宅亦都会有“勇士”接货。

讲呢间屋点解变成凶宅，就要拉返去1982年。当年有个32岁泥水工，因为装修工程接触屋主一家，点知贪心起，居然入屋打劫。被撞破之后将屋主太太同两个细路残忍杀害，仲将尸体收埋喺浴室同杂物房。直到男屋主夜晚返到屋企，先发现屋企惨变凶案现场。

这单凶案当年轰动全港，最后凶手被判终身监禁。自此呢间洋房被冠上“三尸案凶宅”的大名，虽然已经过咗四十几年，依然系香港最经典凶宅之一，讲起都背后一凉。

较估价折四成开拍　无人竞投终两度流拍

讲返今次拍卖，原业主系位外籍人士，早喺2004年用公司名义，以888万买入呢个物业，实用面积1,596平方呎，仲连个花园。单位最新估价明明系1,900万，但上个月拎出来拍卖，开价只系1,180万，足足平咗近四成。放盘相见到，单位装修几企理，内笼亦都新净。

开拍𠮶阵，灯神专登走去现场。拍卖官嗌价嗌到口水干埋，全场依然静到乌蝇飞过都嫌大声，由头到尾冇人举手竞投，个单位好快流拍。事后灯神同拍卖行嘅负责人吹水，佢透露其实呢口价算“抵买”，但“遇唔啱客”。

之后业主唔死心，原价再推第二次拍卖，又系食白果。而到今次第三次，业主心灰意冷“跪低”减价，大刀一劈就200万，开价980万重新推拍。比起最初平咗差唔多两成。

劈价200万欲三度推拍　开拍前1028万突然沽出

灯神本来心谂，单案咁轰动，今次多数又系流拍收场啦。点知剧情峰回路转，未等到正式开拍，已经有神秘买家静鸡鸡出手，用1,028万接咗货，比开拍价仲要高48万！计返条数，原业主持货21年，帐面赚140万，楼价升值大约15%，勉强仲有少少水位。

康乐园街坊出手接货　呎价仅6441元

大家可能会好奇，到底边个咁够胆，敢接手呢个凶宅呢？灯神八到，原来买家都系康乐园嘅业主！𠮶然系“盲公食汤丸——心中有数”。灯神估，呢类街坊买家，心理关口点都易过外人。一来熟晒成个屋苑嘅环境，二来知情况，对传闻早就心里有数，唔似外面嘅人听完单案就毛管戙。

另外睇返价钱，买家用1,028万买入，计落呎价只系6,441蚊，仲要连花园、车位。而且同屋苑正常单位闲闲地过万蚊一呎，所以呢口价喺康乐园来讲，真系“骨折再骨折价”，唔怪得有买家肯接货啦。

凶宅照有人捞　折让三至五成不等

讲开凶宅，实情香港地产市场一向不缺“胆大包天”买家。譬如2008年4月石硖尾仁发大厦𠮶单“少女王嘉梅碎尸案”，当年轰动全城，后来仲改编成电影《踏血寻梅》。而案发嘅㓥房单位自此沦为超级凶宅，隔咗几年之后，竟然低市价一半甩手。就算到2020年单位再转手，比起同厦中层正常单位，都仲有大约三成折让，真系够平就有人敢接货。

另外，荃湾中心1996年𠮶单“六尸命案”，因为涉及多名死者，一直被称为香港数一数二嘅凶宅。单案就算过咗21年，到2017年沽货，都要比市价平近五成先有承接。睇来，香港楼市几时都有班专吼“特价货”嘅买家，只要个价够吸引，几凶都总有人够胆买。

淘大“无尸命案”户贴市价沽　买家疑不知情下入货

不过凶宅市场都有特殊例子。好似2011年牛头角淘大花园单“无尸命案”，涉事单位三年后以银主盘形式放售，最后贴市价成交，几乎冇折让！当时有地产代理透露，估计新买家根本唔知间屋嘅历史，就咁懵盛盛市价入货。

落订前必查清楚　避免误买“古惑”单位

好啦，讲咗咁多凶宅奇闻，灯神都系要提提大家，如果你系正常买家，想避开呢类单位，记住喺落订前，最好揾银行或者按揭转介公司帮手“查家宅”，即系查下估价。凶宅因为承接力弱，银行估价通常会手紧好多。如果银行唔做估价，或者个价比市价低一大截，咁就要打醒十二分精神，间屋可能真系“有古惑”。

买凶宅前必想清：按揭难随时Full Pay、保险贵

至于想专吼凶宅执平货嘅“勇士”，灯神都要温馨提示，买呢啲单位唔系单靠“胆生毛”就够，有两个问题一定要谂清谂楚。第一正如头先所讲，银行对凶宅估价特别保守，好多时直接唔做按揭，买家要预备好“Full Pay”上阵，所以银弹要够厚。

第二就系，唔少保险公司一听凶宅，反应同银行一样，耍手兼拧头。就算肯受保，保费随时贵一截，赔偿范围亦可能大打折扣。即喺火险、家居保呢啲基本嘢，都会因为单位嘅“背景”，而搞到一头烟。

所以话，谂住买凶宅投资或自住，真系要计清楚条数。正如“凶宅大王”伍冠流话斋，“最惊唔系间屋太‘凶’，而系个价太贵！”如果个价“唔够平”到抵销所有麻烦同风险，咁就真系要三思啦。