减息之后，发展商纷纷走出嚟去货，新盘一浪接一浪。灯神近期就喺楼书海之中，捞到一条相当有惊喜嘅“大鱼”——就系由益兆集团控股同俊和发展合作、位于长沙湾青山道439号嘅新盘项目“幸荟（SOYO SQUARE）”。

成个盘只得95伙，由开放式到两房，标准单位实用177至309呎，本身都预咗系“纳米楼”。不过，当灯神翻到楼书某一页，就发现一个几乎刷新下限嘅存在——全盘最细嘅2楼C室，呢个连平台特色单位，实用面积净系得135平方呎，另外连个39呎平台。以实用面积计，呢个单位成为全港第三细嘅户型，大约同车位面积差唔多。

灯神梗系好八卦，最想冲入去见识下呢个135呎最细单位，睇下点样放得落一个人、一张床、一个厕所。不过发展商都几醒，知呢种极致纳米单位太“震撼”，惊吓亲准买家，所以暂时未开放，反而先开咗个223呎单位畀大家“热身”。

223呎细单位、开放式厨房五脏俱全

呢个单位位于22楼E室，实用面积223平方呎，开放式间隔，仲有22呎露台加16呎工作平台，望出去有少少山景加城市街景。灯神亲身直击，觉得项目位置算方便，市区地段，周边有舖位，搭几个站车就到旺角。

入到屋望个厅，第一眼感觉都几正常，摆到张细沙发，而唔系胶凳，室内空间都算有啲呼吸位。开放式厨房喺锌盘上面加咗块活动板，可以切吓生果或者摆两个杯面，而且微波炉同抽油烟机样样有，视觉上算系“五脏俱全”。

厅区尚算住得过　一揭厕所门梦醒

发展商亦都好著重垂直空间，厅入面砌咗个多功能组合床。上层系瞓觉区，大概2米乘1.9米，理论上两个人瞓都得。下层就做咗书台加衣柜，楼梯级每一级又变成储物抽屉。灯神企喺厅度望一圈，心谂“喂，都叫做比想像中住得过㖞。”不过直至灯神伸手推开厕所门——叮！梦醒。

企缸细过高铁厕格　坐厕伸手即洗手

呢个厕所可以话系将“纳米精神”发挥到极致。个企缸有几大？灯神形容畀你听，大概就系一个高铁厕所再打个九折。一个正常大只少少嘅男人企入去，想搽番枧冲凉，手肘基本上要同四围墙身轮流Say Hi。想弯低身捽脚趾，个Pat Pat好大机会同后面幅墙嚟个亲密接触。

灯神由头行到尾，只需一步就行晒个企缸，实际大细就系约两三块地砖。喺呢度冲凉就好似考验紧空间管理同肌肉控制，连转身都要预先打草稿，唔小心就会撞墙，令灯神当场想即刻削肉减磅。

浴厕整体空间亦相当紧绌，喺企缸位踏出去一步，你就可以左手开花洒，转个身顺手关厕所门。而个洗手盘亦都贴墙贴到尽，兼同马桶几乎零距离排列，大概喺你坐低之后，只要手向前伸，就已经可以洗手，完全唔使郁腰。

135呎勉强大过车位　活动空间好过监仓少少

讲到呢度，灯神忍唔住再好奇，咁𠮶个得135呎嘅单位，又会系咩画面？虽然发展商未开放参观，但根据楼书格局，再对照223呎单位缩细版去推演，大概可以幻想到：一打开门就见到全世界，床、厅、厨、厕，一镜过全部交代。扣除浴室厕及开放式厨房面积大约33呎之后，实际可用空间可能只得番100呎。不过灯神提提大家，香港赤柱监狱嘅单人监仓，面积都有大约80呎！

若果再摆埋家私，室内活动空间更加所剩无几。唯一可以“抖吓气”嘅，可能就只系室外个39呎平台。灯神睇返资料，《香港规划标准与准则》列明，一个私家车标准泊车位面积大概系134平方呎，即系点？即系喺幸荟住135呎纳米单位，理论上系勉勉强强大过个车位一丁点。如果架车识讲嘢，可能都会阴阴嘴讲句“你住𠮶格，其实同我差唔多咋。”

龙床盘菁隽“紫禁城再大，皇帝都是瞓一张床。”

讲开纳米楼，点都要捉返屯门 2018 年𠮶个传奇新盘“菁隽”出嚟鞭尸一下。至今全港最细嘅128呎开放式单位，仲细过一个标准车位。单位不设玄关，未计浴室位置，起居室连开放式厨房面积仅约88平方呎。迷你程度系由大门行到屋企尽头，只需一步。

当年吸引多间传媒慕名到现楼“朝圣”，有人一入单位，索性喺中间摊开做大字形自拍，证明成间屋同幅人肉量度尺差唔多大。而瞓喺度由左边碌到右边，全程只需两秒，仲快过灯神转身揾电话。

不过，当年最经典嘅，始终都系发展商𠮶句名言“紫禁城再大，皇帝都是瞓一张床。”一句KO全部质疑，个盘亦因此被封做“龙床盘”。灯神只可以话，发展商算几“贴心”，就算未必有皇帝命，起码可以先体验下同皇帝差唔多嘅活动范围。

纳米楼由限呎政策催生　发展商㓥细搏易出货

灯神回想香港纳米楼嘅发展历程。早年楼市长升长有，地价贵，建筑成本又高，市民买楼门槛愈嚟愈高。2010年起，政府为压抑楼巿，喺部分卖地条款中加入“限呎地”安排，即规定个别地皮上兴建嘅住宅单位，不可超出指定面积，变相令贵价大单位数量减少。

另一边厢，发展商就从中揾到新商机。既然大单位有限，不如将啲楼愈㓥愈细，以较低总价吸引上车客。因为细单位通常就系最易“出货”𠮶批。价钱标得低啲，总有一班上车心切嘅客，咬咬牙觉得可以试下。于是，纳米楼喺十几年前开始冒起，标榜“上车低门槛”、“细细粒，容易食”。直到2022年，政府喺往后嘅卖地项目加入最低面积要求，每个住宅单位实用面积至少要达约 280 呎，情况先至稍为收敛。

纳米盘标榜平价　实际呎价反而卖贵

有趣嘅系，唔少纳米盘表面喺“上车总价平”，实际呎价却高企。譬如“龙床盘”菁隽，2018年首张价单推73伙，售价介乎285万至928.8万元，呎价由13,452元至22,327元。其中一伙实用面积131平方呎开放式，定价285万，呎价冲至约2.2万，直逼港岛楼，夸张到不得了。

缩呎上车变纳米监仓

灯神睇完“幸荟”个盘，只有一声慨叹，楼价高企之下，唔少人靠发展商用“缩呎”来实现上车梦。问题只系，住喺一个细过标准车位、冲凉转身都难嘅空间，换来一个业主嘅身份，呢个代价，究竟值唔值得呢。以前话“龙床不如狗窦”，而家睇来，可能好快“狗窦不如监仓”，甚至连监仓都不如。