近排楼市吹暖风，吹到灯神心郁郁想入市。呢个时候，连地产界“老行尊”施永青都出来瞓身唱好楼市，喺专栏度扬言楼市会在三年内升穿2021年高位，六年仲要累升八成半！呢段“黄金六年”预言一出，听落夸张过许愿池掷银仔。

点知佢旗下嘅基金真系身体力行，三个月豪使逾1.3亿，连扫9伙住宅。正当大家以为系施生亲自落场督师之际，佢竟然话自己“无参与过投资，连楼都无睇过。”咦，呢场“戏”到底系真金白银睇好后市，定系纯粹出口术吹大个市呢？

楼价连升半年初现曙光

楼市由2021年高位跌足几年，阴干唔少业主同投资者，2025年总算有啲起色，差估署最新数字显示，楼价指数连升六个月，年内累升约2.8%，似有回暖迹象。不过同2021年历史高位比，仲差一大截，仍跌逾25%。即系话当年摸顶入市嘅人，至今仲要坐紧艇。

中原地产创办人施永青早前2025年11月喺专栏度淡定分析，佢话楼市已经见底，而且唔会“弹两弹就收工”。施永青指出，楼市有周期性，一复苏就唔会三两个月搞掂，起码玩三至五年。同97年跌足六年、楼价插水七成嘅惨况相比，今次调整只系跌咗三年、三成左右，算系“跌得温和”。佢睇准港元跟住美元贬值、新供应买少见少，加上周期性反弹开始，断言话，“今次楼价的反弹也会比较温和。”

施永青预言楼市　三年破顶、六年升85%

咁“温和反弹”可以升几多？施生唔讲唔知，一讲吓亲街坊。佢拎出中原城市领先指数（CCL）计俾大家睇。如果指数从2025年3月低位134.89点，升返去2021年高位191.34点，呢段基本反弹已经有超过四成升幅。佢断言，三年内破顶并唔出奇。如果个升浪再争气啲，一路持续到2031年，指数甚至有可能见250点。即系话楼价六年内从低位累计升幅，随时达到85%！灯神听到呢度都打咗个突，楼市先啱啱回暖，使唔使睇得咁“离地”呀。

基金平安夜都开工　累斥逾1.3亿扫9伙住宅

讲到最戏肉嘅部分，莫过于施永青旗下基金近月嘅扫货行动，简直豪气到“买楼好似买棵菜”。施生在11月至12月期间几乎冇停过入市，合共以1.045亿元买入8伙住宅单位，包括2伙九龙站擎天半岛、2伙坚尼地城泓都、1伙西环翰林峰、1伙奥运站柏景湾、1伙帝柏海湾、1伙上环荷李活道单位，当中更加系连平安夜都唔舍得收工，密密食唔怕滞。

不过睇返施生嘅入市步伐，其实早系10月份已经展开。当时施生旗下基金连新盘都“唔放过”，10月个阵买咗何文田瑜一高层单位，使咗2,588.7万。其后就开始一连串扫入二手屋苑单位。

专攻九龙站、西环住宅　睇准铁路沿线地段

计埋近三个月，已经狂扫9伙，使费超过1.3亿。基金拣楼亦似乎有一套策略，区域都集中喺九龙站同西环一带，似系睇准铁路沿线及传统贵重升值地段。

施永青：基金扫货非本人话事、无职责拣楼投资

基金扫货扫得咁进取，外界梗系以为系施生亲自落场指挥啦。灯神专登去打探下施生点睇，不过施生竟然明确划清界线，直言本人无参与过，“唔系个人买嘅，我又无去睇过楼，又无决定买边个屋苑、用乜嘢价钱买......唔关我事架。”听落仲好似对基金入市唔多知情，“我无参与，所以唔知用咗几多钱，因为我印象中好似唔止一个基金嘅。”即系话，呢轮扫货根本唔系佢操作。

施生自己仲透露，真正有落手落脚搞嘅，喺漆咸道同般咸道嘅学生宿舍项目。佢指，发展学生宿舍并非单纯为咗投资回报，而系“因应社会发展教育产业嘅需要，为咗外来学生住嘅需要，先连著投资一起去考虑。”至于基金扫返来嘅𠮶啲住宅单位，施生强调“买一间两间𠮶啲细住宅单位，我就唔参与，我公司俾我嘅职责好多，其中无一个职责系拣楼投资。”

基金动作与睇法同步　施生坚称一概不参与

基金扫货扫到咁狠，老板竟然强调“无份玩”。但系基金啲动作，又同施生之前睇好楼市嘅预测鬼咁夹，佢呢番说法听落系有啲“口不对手”㖞。施生就解画，基金确实会接触佢，而佢对楼市嘅预测同看法亦都一直公开同社会分享，所以基金会参考佢对楼市嘅看法都唔出奇。

即系话，基金嘅行动同施生嘅个人观点同步，但佢本人就保持“睇好楼市、但唔睇楼”嘅距离。被问到佢日后会唔会落场参与基金嘅投资，施生就耍手拧头表示，“以前无点参与，以后都唔会点参与。”讲得好决绝。

劝小市民勿盲目跟风　强调量力而为

施永青基金喺咁入市，至于小市民应否跟车？施生语气即刻严肃，话投资要按自己需要同能力，唔好盲目跟风，“我一向不赞成其他人跟随步伐，要跟据自己嘅需要去投资，而唔系话施生买边度，你就买边度。如果要买，都要睇你有没有实际需要同负担能力。”咁又系，佢啲基金闲闲地一注过千万，普通市民点跟得起呢架快车呢。施生自己都讲明，如果真系投资，佢“无设止蚀位”，预摆五年左右先套现。

澄清原意并非强调“升85%”　预测仅供参考

最后施生自己都好谨慎咁补充，话唔好当佢系预测楼市实会升85%，“我唔系想强调话会升八成，𠮶度只喺篇（专栏）文其中一部分内容，不过传媒攞来夸大咗啫。”自己主要肯定楼市会“由慢升转快升”，但升几多就难讲得准，“升几多成无去到咁具体嘅，就唔一定准确，所以唔值得强调。”似乎预留空间俾自己同市场落台阶。照灯神睇来，听人讲楼市，最紧要带定个“脑”同个“计数机”，咪净系带对耳仔呀！