今时今日喺香港，揸住百几万可以做咩？买个车位？畀个首付？谂起都心酸。不过最近拍卖场就出现一个“大只蛤乸随街跳”嘅单位，位于油麻地上海街425号，实用546呎，开价只系135万，比起银行估价300万，足足打咗个四五折。计落呎价只系二千几蚊，仲低过公屋。灯神一听到，即刻心思思想去举牌，点知再睇真啲……

拍卖场现“四五折”盘　两千几蚊呎平过公屋？

呢个单位位于油麻地上海街425号嘅低层，实用面积546平方呎，属于业主盘，起拍价135万，除返开呎价得2,473蚊。今时今日市区楼闲闲地都要万几蚊呎，喺油麻地呢个地段嚟讲，呢个单位简直系“时光倒流再倒流价”。

银行对呢个单位嘅估价去到300万，依家即系四五折大平卖。骤眼睇以为业主等钱使急让，但原来“魔鬼在细节”，代理同灯神讲想入市嘅买家预要Full Pay，即系一炮过俾晒钱，银行较难做按揭。

好奇之下，灯神睇返资料，发现呢幢楼嘅入伙日期系1958年8月，楼龄足足68年，银行喺按揭贷款方面自然会较为审慎。对于一般手头资金有限嘅买家，呢个单位平系平，但要一炮过攞百几万现金，都真系唔系个个都得。

大厦内曾藏“毒窟”　道友拖人出街

点解个盘会平成咁？灯神一查即时心知不妙。原来呢个月15号，单位附近出咗单新闻。当日凌晨一点几，有个58岁姓李嘅男子，被人发现倒卧喺上海街415号对开街头位置，送院后证实不治。

警方接手一查，发现剧情发展真系估佢唔到。原来死者怀疑喺上海街425号嘅一个楼上单位内吸毒晕倒，单位入面嘅人唔单止无Call白车救人，反而有三名大汉将佢由单位拖落去街度，当垃圾咁擗喺路边就算数。警方随即破门入屋，当场拉咗12个男女，检获咪达唑仑（俗称蓝精灵）同吸食工具，单位被揭发系毒窟。

以为毒窟拎出嚟卖？原来系楼上楼下关系

灯神初头睇新闻，心谂“唔系嘛？毒窟都拎出嚟拍卖？边个敢买？”于是同代理讲起，佢就解释拍卖嘅唔系涉事单位，而系佢“楼上𠮶层”。即系话呢个拍卖单位系“干干净净”嘅。

灯神再返睇早年嘅新闻，原来呢幢上海街425号发生过另一宗毒品案。早喺2023年6月，警方大阵仗入屋搜查，喺一个单位入面拉咗9个人，搜出怀疑海洛英、可卡因、冰毒甚至攻击性武器。两年之内，同一幢楼爆两单毒品案，加埋拘捕超过20人。虽然警方大力扫荡，但点解春风吹又生？

“三无大厦”无王管　不法分子趁虚而入

其实理由好简单，因为毒贩睇中呢度“无王管”。佢极可能系“三无大厦”——即系无法团、无居民组织、无管理公司。呢类大厦长年无人管理，楼梯灯坏咗无人整，垃圾堆积无人扫。甚至成幢楼就好似无掩鸡笼咁，大闸长开或者直头无闸，闲杂人等可以自出自入，极可能吸引啲不法分子。今次毒窟，下次唔知系咩窟，街坊住得好唔安心。

政府多招出击　三无大厦仍遍地开花

但实情灯神都见到，政府有落手做嘢去改善三无大厦。早喺2011年就搞咗个“居民联络大使计划”，揾啲业主出嚟帮手夹份搞法团。到2022年又出多招，推出“大厦管理专业顾问服务计划”，委聘非政府组织（NGO）去接触啲街坊，协助筹组法团。

去到2025年仲喺油尖旺、深水埗同九龙城等旧区试行“联厦联管”计划，即系附近几幢旧楼夹埋请同一间管理公司，咁就唔使一幢楼硬食晒啲管理费，大家摊分悭返啲钱，又有返专业管理。

但政府数据显示，截至2024年12月，全港仍有成3,067幢三无大厦。当中油尖旺区有成368幢，距榜首嘅深水埗区仅差一幢。讲到尾，三无大厦嘅问题系多区共同面对嘅难题，唔系一朝一夕搞得掂。

三无大厦乱象丛生　吁政府装闸帮街坊

最后灯神觉得，与其等出事先拉人，倒不如政府再加快出手，先帮啲三无大厦引入基本嘅保安配套。就算一时三刻未必做到咁齐全，至少装返只闸，都已经帮到好多老街坊。因为畀著系灯神，都唔想见到自己楼下周不时“开片”㗎。