新地（0016）西沙第2A期SIERRA SEA呢排卖到成行成市，首轮收飞超过4.2万张，破尽新盘“票王”纪录。不过最令人侧目嘅，系开卖当日售楼处竟然杀出一位“皮草豪客”，豪掷四千几万扫走六个单位，仲淡定咁话“有闲钱就入市”。

而呢位皮草阿伯，灯神八到，竟然就系旧时叱咤街市界嘅“街市大亨”周起鸿！佢个阵承包多个屋邨街市，成功赚大钱，直至1996年隐退江湖。后来喺2014年突然又出现系传媒镁光灯之下，当时周起鸿大手“重注九肚山”，斥资1.07亿元扫入区内屋苑玖珑山7伙，不过现时屋苑楼价跌到面青。静咗咁多年，周生突然“蒲头”重锤押注西沙新盘，究竟系睇准个市，定系重复犯错“再交学费”？

皮草客淡定入货　逾四千万闲钱购6伙

第2A期SIERRA SEA开卖当日，周生着住件深色皮草企喺ICC大堂，表情正经又严肃，成个气场淡定过“食生菜”。佢受访个阵话，今次用四千几万扫入5伙三房同1伙一房，全部谂住长揸收租。虽然口罩遮咗半边面，但听得出，佢嘅语气轻松到好似去街市入两斤菜心咁。十足奖门人金句，“数百万当系碎银”。

大赞“香港系福地” 　唔玩短炒、长揸收租

佢仲话，自己唔玩短炒，入市主要为长揸收租，所以懒理楼价上落。加上屋苑开价平，“输嘅机会比较低啲”。周生又大赞“香港系福地”，住屋需求实有。讲起投资经验，周生大方分享话自己投资物业超过五十年，钟情新盘，现时手揸超过二十个单位，“有闲钱就买间，收租再买间，储吓储吓就系咁”。

自爆“重注九肚山”蚀钱

不过佢都自爆之前“重注九肚山”蚀紧钱，过去五年斋“躺平”无入市。今次一铺清袋，自称已经“一穷二白”，短期唔会再出手。但系睇佢件“皮草战衣”，成个气场都话畀灯神知，呢位伯伯深藏不露。

街市大亨周起鸿现身　由送货员做到包街市

消息一出，灯神睇落呢位皮草大手客好面善，一查发现竟系香港“街市大亨”周起鸿！讲起佢嘅发迹史，都几励志。佢由送货员做起，靠卖珍珠米同空运螃蟹打出名堂，后来更获置地赏识，包办置富花园街市，仲用超市模式搞街市，当年威到尽。

之后佢愈做愈大，攞埋马鞍山、沙田、青衣等多个公屋街市经营权，成立“香港集旺有限公司”，真正成为街市界一哥，自己仲出埋书添。不过1996年佢忽然引退，移民美国，将集旺卖畀宏安邓清河，自此“街市大亨”个朵就转咗手。后来周起鸿回流香港，再度现身楼市搏杀。

2014年落重注　1.07亿扫玖珑山7伙收租

最经典一役系2014年，周起鸿使咗约1.07亿，一铺扫入九肚山新盘“玖珑山”嘅7伙三房，全数攞嚟收租。当年有报道指，佢购入嘅呢批单位面积介乎955至961平方呎，成交价由1,460.8万至1,604.2万元不等，呎价约1.53万至1.67万元。屋苑所在的九肚山一带属豪宅区，周生似系睇准前景。

玖珑山蚀到面青　呎价跌约三成

但讲到呢度，熟楼市嘅你可能已经“O晒嘴”，乜玖珑山唔系蚀到喊咩？冇错！根据中原地产网站嘅最新数据，玖珑山平均近期成交呎价约为1.1万。以周起鸿当年斥资约1.07亿元、七伙单位实用面积合共大约6,685平方呎计，平均买入呎价约1.6万左右，即帐面呎价跌幅约三成，保守估计7伙单位帐蚀大概3,347万，“蚀入肉”三个字可谓贴切。

虽然佢话买嚟收租，以玖珑山最新平均呎租约40蚊计，7伙单位每月租金约26.8万，十年收租约3,216万，但抵销楼价跌幅后，仲要帐蚀约131万。仲未计管理费、差饷及利息呢啲使费，亦遑论早年嘅租金水平无现时高，所以实际条数可能更肉酸。难怪周生今次讲到明不在乎楼价升跌，可能真系睇化晒。

再战SIERRA SEA　预估回报约3.7厘

有咗玖珑山嘅“教训”，周起鸿今次四千万扫SIERRA SEA，系吸取咗经验定又行旧路？睇返租务表现，根据同系其他期数近期两宗租务成交，三房呎租约42蚊，一房呎租约44蚊。粗略估计周生𠮶六伙单位月租共约12.3万，年租金收入约147.6万，租金回报率约3.7厘，算系咁。另一边厢，项目陆续有摸货获利数十万，个市似乎受落。

无铁路交通成死症　忧重演玖珑山惨剧

不过，利淡因素同样“唔讲得笑”。有业界人士同灯神分析，话投资呢个西沙新盘最大风险系交通，无地铁直达系“死症”。住客要去乌溪沙站及大学站，焗住搭巴士或者揸车，分别5分钟同10分钟车程。

虽然发展商已经扩阔咗西沙路，但成个“西沙综合发展区”预计会容纳三万人，到时条路顶唔顶得顺咁多车流，仲系未知数。若果西沙路一打蛇饼，返工返学肯定“攞嚟搞”。所以话呢，冇铁路傍身嘅楼，客路窄过铁路沿线物业好多，尤其难氹到班“无车一族”。第日想放租或者放盘，问津嘅人少一截，保值能力自然“缩水”。

持有成本方面，发展商初步将屋苑管理费暂定4.38蚊一呎，唔算离谱。但由于会所面积庞大，有成148万呎，日后唔确定会否再加价，所以屋苑嘅长揸成本有机会上升。最重要嘅系，周起鸿今次同样系“一注过”买同一个盘，集中风险极高，万一睇错市，可能又重演玖珑山惨剧㗎。

“宝刀未老”还是“老猫烧须”？

再话返转头，周生𠮶件皮草，真系抢眼到爆。着住皮草去买楼，气场十足又有几分老派豪气，似足当年地产黄金年代嘅阔佬作风。佢今次一注过买SIERRA SEA，到底系“宝刀未老”，定系“老猫烧须”？就要等时间同楼市话畀我哋知啦。