如果有得畀你拣，一架200万嘅“波子”同一架高球车，你会要边个？香港兴业（0480）旗下嘅愉景湾豪宅项目“意峰”，呢排以4,228万元卖咗间屋仔。发展商见大客光临，当然要识做，豪送一架声称价值200万元嘅车畀买家。哗，送成两球咁大手笔！但咪住先，灯神戴返副眼镜望真啲条款，原来架车唔单止系二手，仲要系高尔夫球车！最得意嘅系，如果个业主一年内搞唔掂一样嘢，发展商仲有权收返架车添。

先讲讲呢单刁，成交嘅系意峰18号洋房，实用面积2,023平方呎，连埋花园天台，标准豪宅格局，呎价两万蚊左右。买家拣咗60日成交期，发展商系成交记录册写明，包4.25%从价印花税，仲送一架车畀买家。而成单交易嘅戏肉，就系𠮶架随楼附送、号称身价200万嘅“名贵”二手车。

愉景湾洋房送二手车　真正值钱系个牌

大啦啦几千万生意，送架二手车畀贵客，系咪有啲孤寒先？代理老友就笑灯神“唔识货”。原来由香港兴业发展及管理嘅愉景湾，系全港出名嘅“无车天堂”，限制私家车进入，除咗几条专线巴士及的士外，其余车辆一律唔准入。居民想自驾代步唯有靠高尔夫球车。重点来喇，可以喺愉景湾路面行嘅高球车，必须要有“乡村车辆”牌，而发展商呢架车正正就系连牌送嘅。换言之，个旧车壳系其次，牌照先系真正嘅主角。

↓↓意峰2号及15号洋房示范单位↓↓

送旧不送新　大玩“环保”一石二鸟

灯神又问过同区代理，其实呢个高球车牌照，理论上系可以拆出来，“移花接木”套落架新车度。而一架新车普遍市价约20万左右，发展商实情可以买架新车再装个二手牌，当全新礼物送畀业主，做得好好睇睇。但偏偏佢哋选择送架二手车，感觉上似悭得就悭。又或者换个角度睇，发展商可能系为咗响应环保、循环再用，帮业主环保地球嘅同时，顺便“环保”埋自己个荷包，简直系一石二鸟Good Fit。

500个牌两万人争　高球车变另类投资产品

至于点解呢架细车仔会值两球？全因“僧多粥少”四个字。愉景湾地方大，居民出行虽然有穿梭巴士搭，但班次唔多。所以对于区内住户来讲，呢架可以自由行驶嘅高尔夫球车就变得好重要。但政府自1994年起已经封顶，唔再发新嘅“乡村车辆”牌，成个愉景湾由始至终得500个牌照。

随住楼越起越多，住户超过两万人，车就限死500架，价格自然水涨船高。资料显示，愉景湾高球车连牌由初期几万蚊一部，炒到早几年高峰期嘅200万，升幅惊人。就算租车都唔平，月租差唔多要8,000蚊。以200万车价计，租金回报近5厘。有报道指，呢条数当年吸引到唔少投资者入市，令高球车变身另类“投资产品”。

一架高球车够买两架保时捷　外媒都睇到眼突

2018年仲有外媒专登报道呢个现象，话高尔夫球车贵过特斯拉（Tesla）甚至保时捷（Boxster），贵到离晒谱。灯神手痕格下价，架高球车连牌照值两百万，而一架全新保时捷“Macan Electric”SUV卖85.5万，即系话一部愉景湾高球车嘅价钱，够扫两架保时捷之余，都仲有钱剩！呢架时速得三四十公里、无门又无冷气嘅细车仔，身价竟然超越时速220公里嘅保时捷，唔怪得之连外国人都睇到眼突。

高球车价高峰已过　“200万”或系想当年

虽然高球车有价有市，听落做赠品好吸引，但灯神都要泼盆冷水。发展商白纸黑字写明送嘅车“价值200万元”，似乎系用紧高峰期嘅“想当年价”。现实系近年经济环境下行，高球车价都跟住回软。睇返现时市场，车价似乎已经由高位回落唔少，一架带租约嘅旧式四座位高球车叫价140万至178万，而供自用嘅旧式车叫价150万至180万，天价高球车恐怕已成明日黄花。

根据《道路交通（乡村车辆）规例》，喺愉景湾内驾驶高尔夫球车必须持有有效驾驶执照。所以灯神发现发展商嘅成交条款入面，正正有项相关内容：架高球车只可以转名畀愉景湾业主，而该业主必须喺物业完成交易后一年内，成功完成所有高尔夫球车转让嘅批准、牌照或许可，否则视为放弃权益，发展商有权自行处理架车。

讲白啲即系，如果你系一个无驾驶执照嘅富豪，或者纯粹想买楼收租嘅投资者，若一年内搞唔掂转名手续，发展商就视你为“放弃权益”，有权收回呢架价值200万嘅车。情节十足十童话故事《灰姑娘》咁，午夜钟声一响，你有车无牌，架“南瓜车”就会“啪”一声变返南瓜。

如买方未能于该物业成交后12个月内成功取得所有该哥尔夫球车转让所需批准/牌照/许可，则买方将不再享有或视作已放弃本备注以下之优惠，买方并不得就此事向卖方要求索偿或任何补偿。

发展商将“酌情处理”、帮忙处理转名

不过，毕竟买入的豪宅，价值都超过4,000万元，买家都系贵客，发展商相关人士就同灯神讲会“酌情处理”，发展商唔系咁死板会没收呢架二手车。仲话相关条款可以当系发展商善意提醒，须在一年内办理转名至新买家名下；如果一年后未成功转名，发展商亦会帮忙处理，仲强调过去未有出现未成功转名至新买家的情况。

招标文件：买方可提名另一人承受高球车之转让

另外，睇返招标文件资料，若新买家并无香港驾驶执照，买方可书面通知卖方作出一次提名，以另一人承受该哥尔夫球车之转让。不过就受制于该买方提名人是愉景湾内任何物业之时任注册业主。意味新买家就要揾一位于愉景湾持有物业的揾亲朋好友，接受呢架二手高球车的转让，咁样就可以避免出现“放弃权益”的情况。

灯神希望业主可以顺利拎到呢架二手高球车，事关喺呢个“无车天堂”下下行路返屋企都攞命㗎。